«Ժողովուրդ». Իրար ծեծող աղջիկների արարքում հանցակազմ չկա

Դեռ մայիս ամսին համացանցում տեսանյութ տարածվեց, որտեղ երևում էր, որ Աջափնյակի թիվ 102 դպրոցի աղջիկները միմյանց ծեծում են։ ՀՀ ոստիկանության քննիչները որոշել են, որ աղջիկների արարքում հանցակազմ չկա, դրա համար էլ քրեական գործն այս տարվա հուլիսի 14-ին կարճվել է։

Թերթը հիշեցնում է, որ դեպքը տեղի է ունեցել 2010-ի հոկտեմբեր-նոյեմբեր ամիսներին, սակայն համացանցում այն հայտնվել էր 2012-ի մայիսին։ Ինչպես տեղեկացրել էր բթերթը, տեսանյութում ծեծվող աղջիկը՝ Ք. Պ.–ն, անցյալ տարի դուրս էր եկել դպրոցից, որովհետև ամիսներով բացակայել էր դասերից։ Անգամ բացակաների պատճառով մնացել էր նույն դասարանում։ Դրա համար էլ 16 տարին լրանալուց հետո մայրը դիմում էր գրել և դպրոցից վերցրել գործերը։

Ըստ թերթի տեղեկությունների՝ ծեծվող աղջիկը, որը դպրոցից վաղաժամ դուրս էր եկել, դայակ է աշխատել։ Հիմա նրանից ոչ ոք տեղեկություն չունի։ Իսկ ծեծող աղջիկը՝ Մ. Ե.–ն, այս տարի ավարտել է դպրոցը։ Վերջինս դասերին նորմալ հաճախել է, աշխույժ, ակտիվ երեխա է եղել, բայց թույլ սովորող։

Մամուլում եղած տեղեկությունների համաձայն՝ աղջիկներն իրար ծեծել են ինչ-որ տղայի պատճառով։ Թեև լուրեր կային, որ վիճաբանությունը ծագել է աղջիկներից մեկի մորը վիրավորելու համար։

«Ժողովուրդ»–ն օրեր առաջ զրուցել է Աջափնյակի թիվ 102 դպրոցի տնօրեն Ռուզաննա Հայրապետյանի հետ, որը տեղեկացրել է, որ ՀՀ ոստիկանության քրեական հետախուզության գլխավոր վարչության անչափահասների գործերով բաժնի պետ Նելլի Դուրյանի կողմից խիստ արգելվել է որևէ լրատվամիջոցի տեղեկություն տրամադրել այս թեմայով։ «Քանի որ համացանցում տեսանյութի հայտնվելուց հետո այդ աղջիկը (ծեծողը) հոգեկան ապրումների մեջ էր ընկել։Դրա համար էլ այդ թեման փակվեց, որպեսզի երեխային այդ վիճակից հանենք»,–պարզաբանել է դպրոցի տնօրենը։

Նրա խոսքերով՝ աղջիկը շատ է զղջացել ու ափսոսացել կատարվածի համար, դրա պատճառով էլ հայտնվել է վատ վիճակում։ «Որպես դպրոց՝ կրթող ու դաստիարակող օջախ, որոշեցինք իրեն այդ տրավմայից դուրս բերել։ Զրուցեցինք իր հետ, ինչ որ պետք էր՝ ասացինք։ Անընդհատ լաց էր լինում ու մտածում, թե էս ինչ է արել։ Երեխա է եղել, չի հասկացել, թե ինչ է արել։ Իսկ ընկերներն էլ նորմալ են ընդունում նրան, ո՛չ ավել, ո՛չ պակաս վերաբերմունք»,–եզրափակել է թերթի զրուցակիցը։