Պարզվել է՝ Կանադայի հյուսիսում գտնվող իջվածքը հարվածային խառնարան է

Երկրաբանները Կանադայի բևեռային գոտում հայտնաբերել են մինչ այժմ անհայտ մի խառնարան։ Այս մասին հաղորդվում է Սասկաչևանի Համալսարանի պաշտոնական կայքում։

Գիտնականները խառնարանը նկատել են մոտ երկու տարի առաջ Վիկտորիա կղզու տեղազննության ընթացքում՝ ուղղաթիռից։ Այս ժամանակամիջոցին հետազոտողները ճշգրտել և կազմել են տեղանքի երկրաբանական քարտեզը, հավաքել նմուշներ և իրականացրել երկրաբանական այլ հետազոտություններ։

Գտնված գոյացությունը երկրաբաններն անվանել են Ալբերտ Արքայազնի Խառնարան։ Մոտ 25 կմ տրամագծով այս գոյացությունը դարձել է Կանադայի տարածքում հայտնի 30-րդ խառնարանը։ Ըստ արդի կարծիքի՝ այս խառնարանի առաջացման պատճառ դարձած աստերոիդը Երկին բախվել է 350-130 միլիոն տարի առաջ։

Ավելի վաղ նույն տարածքի հետազոտությամբ զբաղվել է մեկ այլ գիտական խումբ, որն իր հերթին հայտնաբերել էր բևեռային այս շրջանի համար անսովոր թեքություններ երկրաբանական շերտերում։ Ներկա աշխատության հեղինակները, սակայն, հետազոտվող շրջանում գտել են ջարդվածքային կոներ (shatter cone), որոնք գոյանում են միայն աստերոիդների անկման վայրերում և հանդիսանում են հարվածային ալիքի առկայության իրեղեն ապացույցներ։

Երկրագնդի վրա ներկայումս հայտնի է մոտ 160 երկնաքարային խառնարան կամ աստրոբլեմ, ինչն անհամեմատ ավելի քիչ է, քան միևնույն տարիքի այլ մոլորակների նույն ցուցանիշից։ Այս հանգամանքը Երկրին հատուկ երկրաբանական ակտիվության և արագընթաց էրոզիայի հետևանք է։