Հայաստանը մտադիր է դեսպանատուն բացել Ինդոնեզիայում

Երեկ՝ օգոստոսի 8-ին, Հայաստանի ԱԳ նախարար Էդվարդ Նալբանդյանն այցելել է Ինդոնեզիայի Հանրապետություն, որտեղ հանդիպում է ունեցել Ինդոնեզիայի ԱԳ նախարար Մարտի Նատալեգավայի հետ:

Բարի գալուստ մաղթելով Էդվարդ Նալբանդյանին՝ Ինդոնեզիայի ԱԳ նախարարը հույս է հայտնել, որ այդ այցելությունը նոր էջ կբացի երկկողմ հարաբերություններում, քանի որ Հայաստանի և Ինդոնեզիայի փոխգործակցությունը զարգացման մեծ ներուժ ունի, և տվյալ այցելությունը լավ հնարավորությունն է ընձեռում քննարկելու այդ ներուժի բացահայտման և օգտագործման ուղիները, ինչպես նաև ընդգծել է, որ իր երկիրը ցանկանում է նոր թափ հաղորդել երկկողմ հարաբերություններին:

Շնորհակալություն հայտնելով Ջակարտա այցելելու հրավերի համար՝ Էդվարդ Նալբանդյանն ասել է, որ այցելությունը խորհրդանշական է, քանի որ տեղի է ունենում երկու երկրների միջև դիվանագիտական հարաբերությունների հաստատման 20-րդ հոբելյանական տարում և կարևորեց Ինդոնեզիայի հետ տարբեր բնագավառներում փոխգործակցության զարգացման և ընդլայնման վերաբերյալ պայմանավորվածությունների ձեռքբերումը, որը նախարարի բնորոշմամբ իր այցելության գլխավոր նպատակն է:

«Շարմ էլ-Շեյխում ուղիղ երեք ամիս առաջ տեղի ունեցած հանդիպմանը մենք պայմանավորվեցինք գործնական քայլեր ձեռնարկել՝ ամրապնդելու և խորացնելու մեր երկկողմ համագործակցությունը, և ես ուրախ եմ արձանագրել, որ այսօր, ի պատասխան Ձեր հրավերին, ես գտնվում եմ Ջակարտայում հենց այդ նպատակով: Ցանկանում եմ տեղեկացնել Ձեզ մոտ ապագայում Ինդոնեզիայում՝ Հարավ-Արևելյան Ասիայում կարևոր դերակատարություն ունեցող երկրում, դեսպանատուն բացելու Հայաստանի մտադրության մասին, ինչը հավելյալ նոր լիցք և որակ կհաղորդի մեր հարաբերություններին»,- ընդգծել է ՀՀ արտգործնախարարը:

Ողջունելով Ջակարտայում դեսպանություն բացելու Հայաստանի մտադրությունը՝ նախարար Նատալեգավան շեշտեց, որ Ինդոնեզիայի իշխանությունները ամենայն աջակցություն կցուցաբերեն դեսպանատան աշխատանքներին:

Զրուցակիցները հանգամանալից զրույց են ունեցել երկկողմ բարեկամական հարաբերությունների զարգացման ուղղությամբ ձեռնարկվելիք քայլերի վերաբերյալ, պայմանավորվածություն ձեռք բերել քաղաքական երկխոսության ակտիվացման, միջազգային կազմակերպություններում փոխգործակցության սերտացման, իրավական դաշտի ձևավորման, առևտրատնտեսական և գիտատեխնիկական համագործակցության զարգացման ուղղությամբ աշխատանքներ իրականացնելու մասին:

Գործարար կապերի խթանման քննարկումների ենթատեքստում նախարարները քննարկել են Հայաստանի և Ինդոնեզիայի Առևտրի պալատների համագործակցության հնարավորությունը:

Նախարար Նալբանդյանը ներկայացրել է Հայաստանի արտաքին քաղաքականության հիմնական ուղղություններն ու առաջնահերթությունները, կովկասյան տարածաշրջանում անվտանգության և համագործակցության հաստատման ուղղությամբ Հայաստանի կողմից ձեռնարկվող քայլերը: Նախարար Նալբանդյանն իր ինդոնեզացի գործընկերոջը ներկայացրեց արցախյան հիմնախնդրի կարգավորան գործընթացի վերջին զարգացումները: Նախարաները համակարծիք էին, որ հիմնախնդրի խաղաղ բանակցային կարգավորումն այլընտրանք չունի:

Հայաստանի արտգործնախարարն իր ինդոնեզացի պաշտոնակցին հրավիրել է Երևան:
Հայաստանի և Ինդոնեզիայի ԱԳ նախարարները միջկառավարական համաձայնագիր ստորագրեցին «Հայաստանի Հանրապետության կառավարության և Ինդոնեզիայի Հանրապետության կառավարության միջև տնտեսական, գիտական և տեխնիկական համագործակցության մասին»:

Հանդիպումից հետո նախարարները հանդես են եկել համատեղ մամլո ասուլիսով:
Ջակարտայում Էդվարդ Նալբանդյանը հանդիպում է ունեցել նաև Ինդոնեզիայի էկոնոմիկայի հարցերի համակարգող նախարար Մուհամադ Հատա Ռայասայի հետ:

Հանդիպման ընթացքում մտքեր են փոխանակվել հայ-ինդոնեզական առևտրատնտեսական համագործակցության խթանմանն ուղղված քայլերի՝ ներդրումային հնարավորությունների ուսումնասիրման, գործարար համաժողովների, ցուցահանդեսների կազմակերպման, երկու երկրների գործարար շրջանակների միջև կապերի ստեղծման, բարձր տեխնոլոգիաների, գյուղատնտեսության, զբոսաշրջության ոլորտներում փոխգործակցության վերաբերյալ:

Էդվարդ Նալբանդյանն ու Մուհամադ Հատա Ռայասային կարևորել են Հայաստանի և Ինդոնեզիայի միջև տնտեսական, գիտական և տեխնիկական համագործակցության մասին համաձայնագրի ստորագրումը, որով նախատեսվում է ստեղծել հայ-ինդոնեզիական համատեղ համաձնաժողով:

Երեկոյան, ավարտելով այցելությունը Ջակարտա՝ Էդվարդ Նալբանդյանը ուղևորվել է Օքլենդ, որտեղ այսօր՝ օգոստոսի 9-ին, ՀՀ ԱԳ նախարարը հանդիպում է ունենալուՆոր Զելանդիայի արտգործնախարարի հետ: