Ինչո՞ւ չխոսվեց Եվրասիական միության մասին

Հայաստանյան վերլուծական միտքն արձանագրել է, որ Սարգսյան-Պուտին երեկ կայացած հանդիպումից հետո, մամուլի համար արված հայտարարության մեջ ո՛չ Պուտինը, ո՛չ Սարգսյանը բառ անգամ չարտաբերեցին Եվրասիական միության մասին։ Եվ սա, թերևս, երկու նախագահների հանդիպման գլխավոր քաղաքական ինտրիգը պետք է համարել։

Մինչ հանդիպումը Հայաստան մի շարք բարձրաստիճանն ռուս պաշտոնյաների այցերից հետո, երբ ակտիվորեն շրջանառության մեջ դրվեց նոր ստեղծվելիք այդ միության հարցը, ակնկալվում էր, որ այն կքննարկվի նաև նախագահների հանդիպմանը։ Դա տեղի չունեցավ, համենայնդեպս, այդ մասին է վկայում պաշտոնական հայտարարությունների տեքստերում այդ մասին որևէ ակնարկի բացակայությունը։

Lurer.com-ի խնդրանքով, փաստը մեկնաբանեց լրագրող, «Ժառանգություն» կուսակցության վարչության անդամ Լուսինե Պետրոսյանը.

«Կարծում եմ՝ միջպետական հարաբերություններում նշանակություն չունի՝ ինչ է քննարկվում, այլ այն, թե ինչն է բարձրաձայնվում։ Եթե չի հայտարարվել, էական չէ՝ քննարկվել է, թե ոչ։ Այդ պարագայում պետք է արձանագրվի մեկ բան. որ Եվրասիական միության հարցն օրակարգում չէ։ Կարծում եմ՝ Պուտին-Սարգսյան հանդիպման համատեքստում Եվրասիական միության հարցի շոշափման առումով տեղի ունեցավ այն, ինչ եղավ վրաց-օսեթական պատերազմի ժամանակ, երբ որքան էլ Ռուսաստանը խնդրեց, համոզեց, կամ փորձեց պարտադրել, Հայասատանն այդուհանձերձ չճանաչեց Աբխազիայի և Օսիայի անկախությունը։ Կարծում եմ՝ սա է, որ տեղի է ունեցել այս հանդիպմանը»: