Մակրոնը հայ համայնքի հետ հանդիպման ժամանակ մեկնաբանել է «դարի գործարքը»՝ «Խաղաղության հասնելու համար երկուսն են պետք»

Ֆրանսիայի նախագահ Էմանուել Մակրոնը, մեկնաբանելով ԱՄՆ-ի հրապարակած իսրայելա- պաղեստինյան կարգավորման պլանը, որը հայտնի է որպես «դարի գործարք», հայտարարել է, որ խաղաղության հասնելու համար «երկուսն են պետք», հայտնում է ՌԻԱ Նովոստին՝ հղում կատարելով Figaro թերթին։

Թրամփը երեքշաբթի օրը հայտարարել է «դարի գործարքի» մշակման արդյունքների՝ Իսրայելի եւ Պաղեստինի միջեւ համաձայնագրի նախագծի մասին, որը պետք է վերջ դնի հակամարտությանը տարածաշրջանում։ Պլանը նախատեսում է Պաղեստին պետության ստեղծում եւ դրա ապառազմականացում, ընդ որում Իսրայելը կպահպանի Հորդանան գետի արեւելքի վերահսկողությունը, իսկ Երուսաղեմը կմնա նրա անքակտելի մայրաքաղաքը։

«Խաղաղության հասնելու համար երկուսն են պետք։ Չի կարելի դրան մեկ կողմով հասնել»,- Փարիզում հայ համայնքի ներկայացուցիչների հետ ճաշի շրջանակներում լրագրողներին ասել է Մակրոնը։

Ֆրանսիայի նախագահին նաեւ հարցրել են, թե դեռ հավատում է արդյոք նա հակամարտության կարգավորման համար «երկու պետությունների» կոնցեպցիային։ «Ես հավատում եմ երկու ինքնիշխանությանը»,- պատասխանել է Մակրոնը։ Թերթի հոդվածում նրա ակնարկը «խորհրդավոր» են անվանել։

Իսրայելի վարչապետ Բենիամին Նեթանյահուն հայտարարել է, որ գործարքը որպես Պաղեստինի մայրաքաղաք է նախատեսում Երուսաղեմի արեւելյան ծայրամասում գտնվող Աբու Դիսը, որը քաղաքի սահմաններից դուրս է։

Պաղեստինի ղեկավար Մահմուդ Աբասը մերժել է նոր պլանը՝ հայտարարելով, որ պաղեստինցիները պնդում են իրենց պետության 1967թ․ սահմաններով եւ Երուսաղեմ մայրաքաղաքով ճանաչումը։