Իջևանյան ԽԾԲ. ինչպես են վարչապետի մտերիմները պաշտոններ ստանում Նոր Հայաստանում

Վերլուծական 1 Փետրվար, 2020 16:30

Ընդդիմադիր Նիկոլ Փաշինյանը հաճախ էր մեղադրում Սերժ Սարգսյանին՝ կլանային քաղաքականության և իր քավոր-սանիկներին, դասընկերներին և բարեկամներին ամենա յուղոտ պաշտոնները բաշխելու մեջ: Փաշինյանը հայտարարում էր` եթե ինքը լիներ երկրի ղեկավար՝ քավորները և սանիկները պետական համակարգից «դուրս են շպռտվելու», քանի որ սա պետություն է, ոչ թե «թայֆա»:

Իհարկե, ընդդիմադիր Փաշինյանի հայտարարությունները ճշմարտություն էին, Սերժ Սարգսյանի մտերիմ շրջապատը իսկապես հաջողացնում էր բարձր պաշտոններ ստանալ և ապրել առոք-փառոք: Սակայն, ի՞նչ է այս առումով փոխվել Նոր Հայաստանում, արդյոք արդեն վարչապետի պաշտոնը զբաղեցնող Նիկոլ Փաշինյանը ինքը զե՞րծ է մնացել յուրայիններին պաշտոններ բաշխելուց: Մասնավորապես, Արարատի մարզպետ Գարիկ Սարգսյանը չի հերքել, որ Փաշինյանի հետ քավոր-սանիկական կապերի մեջ է: Իմ Քայլից Վահե Ղալումյանը, ինչպես նաև Իջևանի քաղաքապետի ընտրություններում Իմ Քայլի թեկնածու Հայկ Ղալումյանը, Փաշինյանի մտերիմ ընկերներն են: Հայկ Ղալումյանը նաև Փաշինյանի քավորն է: Լյովա Երանոսյանին իր պաշտոնում փոխարինած Վահե Ղազարյանը, ով նախքան այս պաշտոնում նշանակվելը Տավուշի մարզային վարչության պետն էր, ըստ մամուլի տեղեկությունների, վարչապետ Նիկոլ Փաշինյանի համադասարանցին է: Իջեւանի անտառտնտեսության տնօրենի պաշտոնում նշանակվել էր Մհեր Ղալթախչյանը, ով նույնպես Փաշինյանի ընկերական շրջապատից էր: Տավուշի մարզպետարանի կրթության բաժնի վարիչ էլ նշանակվել էր Մանե Ղազումյանը, ով, որոշ տեղեկությունների համաձայն, վարչապետի դասընկերուհին է, կամ ՝ առնվազն սովորել է վերջինիս հետ նույն դպրոցում:

Բերենք մեկ այլ օրինակ ևս՝ ՀՀ Էկոնոմիկայի նախարարի արդեն նախկին տեղակալ Արտակ Քամալյանը փետրվարի 1-ից կստանձնի Եվրասիական տնտեսական հանձնաժողովի արդյունաբերության և ագրոարդյունաբերական համալիրի հարցերով Կոլեգիայի անդամի (նախարար) պաշտոնը: Քամալյանը ծնունդով Տավուշից է, ավելի կոնկրետ Իջևանին հարակից Խաշթառակ գյուղից: Ըստ մամուլի տեղեկությունների ՝ չնայած նա ընդամենը նախարարի տեղակալն էր, սակայն Փաշինյանը հիմնականում նրա հետ էր խորհրդակցում գյուղատնտեսական հարցերով։ Ավելին, նրա խորհրդով է նաև կրճատվել ՀՀ Գյուղնախարարությունը և միացվել ՀՀ Էկոնոմիկայի նախարարությանը։ Հետագայում՝ 2019 թվականի հունիսի 4-ից, Արտակ Քամալյանը նշանակվեց ՀՀ էկոնոմիկայի նախարարի տեղակալի պաշտոնում և կոորդինացնում էր գյուղատնտեսական ոլորտը։

Այս օրինակները գալիս են ապացուցելու, որ Նիկոլ Փաշինյանը փաստացի անում է նույնը՝ ինչի մեջ մեղադրում էր Սերժ Սարգսյանին: Ստացվում է` «թայֆայության» ոգին, կլանային քաղաքական մտածելակերպը տեղ է գտել նաև Նոր Հայաստանում…