Առողջապահության նախարարն այցելել է Գեղարքունիքի մարզ

Հայաստան 9 Օգոստոս, 2012 18:24

ՀՀ առողջապահության նախարար Դերենիկ Դումանյանն այսօր հերթական մարզային այցն է կատարել։ Գեղարքունիքի մարզպետ Ռաֆիկ Գրիգորյանի ուղեկցությամբ նախարարն այցելել է Ճամբարակի առողջության կենտրոն:

Դերենիկ Դումանյանը հետաքրքրվել է կենտրոնի խնդիրներով, զրուցել բուժաշխատողների և բուժվող հիվանդների հետ:

Որպես ամենահրատապ խնդիր ներկայացվել են շենքի անմխիթար վիճակը և պայմանները։ Կենտրոնը նաև նեղ մասնագետների կարիք ունի։ Դերենիկ Դումանյանը տեղեկացրել է, որ կադրային պակասը կփորձեն լրացնել Երևանի պետական բժշկական համալսարանի այս տարվա շրջանավարտներով, ինչպես նաև եղած մասնագետներին ցանկության դեպքում պետական պատվերի շրջանակներում վերամասնագիտացումով։

«Իմ այս այցերի նպատակը մարզերում տիրող վիճակը, մասնավորապես՝ առողջապահության ոլորտում առկա խնդիրներն ավելի լավ պատկերացնելն է։ Որովհետև իմ առաջնային նպատակներից մեկն այն է, որ մարզի բժիշկը լավ վարձատրվի և լավ ապրի։ Այդ ուղղությամբ արդեն քայլեր ենք անում։ Բայց դուք էլ ձեր հերթին լավ պիտի աշխատեք։ Ճամբարակցին արժանի է թե՛ ձեր հոգատարության, թե՛ լավագույն հիվանդանոցի։ Շատ լավ վերաբերվեք սահմանամերձ շրջանի բարձր ոգի ունեցող ազգաբնակչությանը, որովհետև նրանք մեր սահմանապահներն են»,-ասել է Դերենիկ Դումանյանը։

Այնուհետև նախարարն այցելել է Ծովագյուղի ամբուլատորիա: Այստեղ նրան զեկուցել են, որ վերջերս Այգուտ գյուղում արձանագրված տուլարեմիայի մեկ դեպքի առիթով բոլոր կոնտակտավորները և ռիսկի խմբում ընդգրկված ազգաբնակչությունը պատվաստվել են։

Սևանի հիվանդանոցի բժիշկների հետ Դերենիկ Դումանյանը քննարկել է ծնունդների' դեպի մայրաքաղաքային ծննդատներ անհարկի հոսքի խնդիրը։

Սևանի պոլիկլինիկայում ևս նախարարը զրուցել է կոլեկտիվի հետ, լսել նրանց հոգսերի մասին։ Պոլիկլինիկայի հիմնական մասնաշենքն անցյալ տարի նորոգվել է Հայաստանի սոցիալական ներդրումների հիմնադրամի միջոցներով, իսկ ՀՀ առողջապահության նախարարությունը կահավորել է այն: Նախարար Դումանյանը ծանոթացել է նաև պոլիկլինիկայի տարածքում գործող Շրջանային ակնաբուժական կենտրոնի գործունեությանը։

Այցի շրջանակներում ՀՀ առողջապահության նախարար Դերենիկ Դումանյանը Գեղարքունիքի մարզպետ Ռաֆիկ Գրիգորյանի հետ մասնակցել է Արծվաշենի անկման 20-ամյակի առիթով կառուցված հուշակոթողի բացմանը: