Տեղի են ունեցել «Երիտասարդների կարողությունների եվ հմտությունների զարգացում» խորագրով դասընթացներ

ՀՀ սպորտի և երիտասարդության հարցերի նախարարության աջակցությամբ «Երիտասարդական ալիք» հասարակական կազմակերպությունը օգոստոսի 4-7-ը Վանաձոր քաղաքում «Մարզային երիտասարդության ակտիվ մասնակցություն հանրային գործընթացներում» հետազոտական ուսուցողական ծրագրի շրջանակներում անցկացվել է «Երիտասարդների կարողությունների և հմտությունների զարգացում» խորագրով դասընթաց, որին մասնակցության հայտ էին ներկյացրել Լոռու մարզի տարբեր համայնքների երիտասարդներ: Հատուկ ուշադրություն էր հատկացվել սահմանափակ հնարավորություններով երիտասարդների մասնակցությանը:

Ծրագիրն ուղղված է Լոռու մարզի առավելապես գյուղական համայնքների երիտասարդներին և նպատակ ունի ապահովել նրանց ակտիվ մասնակցությունը հանրային կյանքում, ներգրավել համայնքային զարգացման և երիտասարդությանն ուղղված ծրագրերի մշակման ու իրականացման գործընթացներում: Դասընթացները վարում էին ՀՀ վարչապետին առընթեր ազգային երիտասարդական քաղաքականության խորհրդի անդամներ Ռազմիկ Սարդարյանը և Աշոտ Հակոբյանը:

Ծրագրի շրջանակներում ՀՀ սպորտի և երիտասարդության հարցերի նախարարության աշխատակազմի երիտասարդական քաղաքականության վարչության պետ Արմեն Պապյանը ներկայացրեց Հայաստանի Հանրապետության պետական երիտասարդական քաղաքականությունը: Դասընթացի մասնակիցները ծանոթացան նաև «Հայաստանի երիտասարդության ազգային զեկույցին», հանրային քաղաքականությանը, մասնակցության ձևերին, խմբային աշխատանքին, շահերի պաշտպանությանը: