«Չորրորդ ինքնիշխանություն». Կճոյանն ու նրա սանիկը՝ "JOSE"-ի սեփականատերը, հակադարձել են «ՉԻ» հրապարակմանը

««ՉԻ»-ին չորեքշաբթի լույս տեսած համարում «Կճոյանի սանիկին «օգնել» են յուրացնել գումարը եւ անպատիժ մնալ» վերնագրով հրապարակման ներքո տեղեկացրել էինք, որ Արարատյան հայրապետական թեմի առաջնորդ Նավասարդ Կճոյանի սանիկը՝ ՀՀ քաղաքացի Մհեր Ավետիսյանը, 12 միլիոն ԱՄՆ դոլար է «քցել» ՌԴ քաղաքացի, ՌԴ-ում գործող «Ռենովա» ընկերության տնօրեն Գեորգի Իոսիֆյանից:

Այս փաստով հարուցված քրեական գործը քննել է ՀՀ Ազգային Անվտանգության Ծառայությունը, հենց այս կառույցն էլ գործը պարզապես «ջրել» է՝ ապավինելով այն մտքին, որ «քցված» ներդրողը չի բողոքի, եւ այս պատմությունը հրապարակային չի դառնա: Գրել էինք, որ Մհեր Ավետիսյանը Կճոյանի այն սանիկն է, որն իր քավորին «Բենթլի» մակնիշի ավտոմեքենա էր նվիրել: Բացի այս, նկատել էինք, որ Մհեր Ավետիսյանին է պատկանում Խանջյան փողոցում տեղակայված մեծ ռեստորանային համալիրը՝ «Jose»-ն, որտեղ կարելի է հանդիպել բազմաթիվ տժժացող «հոգեւորականների»՝ հոգեւորականի սեւ սքեմներով եւ քաղաքացիական հագուստով: «Շրջանառվող խոսակցությունների համաձայն՝ Մհեր Ավետիսյանը գործունեություն է ծավալել եւ ծավալում է Նավասարդ Կճոյանի բարձր հովանու ներքո, իսկ Կճոյանն էլ հովանավորվում է ՀՀ վարչապետ Տիգրան Սարգսյանի կողմից: Հիշեցնենք, որ ոչ վաղ անցյալում «Բենթլիի» թեմային զուգահեռ, քննարկվում էր այն իրողությունը, թե ինչու է ՀՀ վարչապետ Տիգրան Սարգսյանը զենքով պարգեւատրել այս հոգեւորականին». մեր այս հրապարակմանը արձագանքել է Մհեր Ավետիսյանը (տես էջ 3):

«ՉԻ» հրապարակմանը արձագանքել է նաեւ արքեպիսկոպոս Նավասարդ Կճոյանը՝ հայտարարելով, թե ինքը այցելում է ոչ միայն «Jose», այլեւ «Նոյան տապան», «Օջախ» եւ այլ ռեստորաններ: Կճոյանը հերքել է տեղեկությունները, թե ինքը հովանավորում է իր սանիկին՝ Մհեր Ավետիսյանին, հավելելով, որ ինքը ոչ թե վերջինիս, այլ նրա երեխայի քավորն է: «News.am»-ի թղթակցի հետ զրույցում, անդրադառնալով Մհեր Ավետիսյանի գումար յուրացնելու եւ անպատիժ մնալու «ՉԻ» տեղեկությանը, նա նշել է, որ այդ հարցով ճիշտ կլինի դիմել հենց նրան: «Ես իր գործունեության հետ ընդհանրապես կապ չունեմ, դրանք ինձ չեն վերաբերում: Իսկ իմ մասով ինչ գրած է մամուլում, դա դետեկտիվ է»,– նշել է Նավասարդ Կճոյանը: Կայքը նաեւ արձանագրել է, թե իր տեղեկություններով արքեպիսկոպոսն իր սանիկի հոր՝ Մհեր Ավետիսյանի հետ միասին, մասնաբաժին ունի Խանջյանի օղակաձեւ այգում գտնվող «Jose» ռեստորանային համալիրում եւ նրան հաճախակի կարելի է այնտեղ տեսնել: Այս առնչությամբ, Կճոյանն ասել է. «Բացառվում է, դա սուտ է: Ես այցելում եմ, իհարկե, ոչ միայն «Jose», ուրիշ տեղեր էլ, օրինակ՝ «Նոյան տապան», «Օջախ» եւ այլ ռեստորաններ, երբ հյուրեր են լինում, այցելում ենք տարբեր տեղեր»:

Ի դեպ՝ մեզ հետ զրույցում Մհեր Ավետիսյանն ասաց, որ ինքը որեւէ «կռիշ» չունի: «Եթե ունեմ, ուրեմն՝ գրեք, որ այդ «կռիշը» ծակ է»,– ասաց Ավետիսյանը»՝ հայտնում է թերթը: