Արցախում ՀԷԿ-երի թեման շարունակում է թեժ մնալ. Քանանյանը չի ընդգրկվել նորաստեղծ հանձնաժողովում

Արցախի Շահումյանի շրջանի Քարավաճառ քաղաքի բնակիչ, քաղաքագետ Ալեքսանդր Քանանյանը դադարեցրել է հացադուլը: Նա հունվարի 21-ից 16 օր շարունակ հացադուլ էր իրականացնում՝  Քարվաճառում փոքր ՀԷԿ-երի շինարարական աշխատանքները դադարեցնելու պահանջով: Ավելի ուշ նրան միացավ նաև արցախցի Մհեր Պողոսյանը, ով ամբողջովին կիսում էր Քանանյանի տեսակետն ու պահանջները: Երեկ երեկոյան հայտնի դարձավ, որ նրանք երկուսն էլ դադարեցրել են հացադուլը:

«Ստեփանակերտում մեզ համար թափանցիկության պայմաններով ձևավորվել է հատուկ մասնագիտական հանձնաժողով, որի նպատակը պետք է լինի ուսումնասիրել գործող ՀԷԿ-երի համապատասխանությունն օրենսդրությանը, բնապահպանական կարգավորումներին: Հաշվի առնելով այն, որ շինարարական աշխատանքները դադարեցված են և անսալով ընկերներիս հորդորներին՝ առաջին փուլը համարում եմ ավարտված և դուրս եմ եկել հացադուլից»,-ԼՈՒՐԵՐ.com-ի թղթակիցի հետ զրույցում ասաց Քանանյանը:

Նրա խոսքով՝ ներկա պահին տեխնիկան դուրս բերված չէ շինհրապարակներից և այդ հարցում որոշակի զիջումների են գնացել. «Ձմռանը շինարարություն չի իրականացվում, և տեխնիկան մեկ այլ տեղ տանելու խնդիր այս պահին չկա»:

Քանանյանը նշեց, որ այն ամենը ինչ ունեն՝ խնդրի լուծում չէ. «Նպատակն այն է, որ չկառուցվեն փոքր ՀԷԿ-եր, իսկ կիսակառույցները՝ ապամոնտաժվեն»:

Հարցին, թե նա ընդգրկվա՞ծ է նորաստեղծ հանձնաժողովում՝ Քանանյանը պատասխանեց. «Ըստ պայմանավորվածություների՝ ես կարող էի մասնակցել հանձնաժողովի աշխատանքներին, բայց, հաշվի առնելով իմ առողջական վիճակն ու մասնագիտական անպատրաստ լինելս, քանի որ բանասեր-պատմաբան եմ, նպատակահարմար գտա իմ վստահությունը վայելող մարդկանց խնդրել ինձ փոխարինել»: 

Հիշեցնենք, որ Քանանյանի հացադուլի դադարեցման թեմային երեկ երեկոյան անդրադարձել էր նաև Արցախի Հանրապետության մարդու իրավունքների պաշտպան Արտակ Բեգլարյանը՝ ֆեյբուքյան իր էջում գրելով.«Ուրախ եմ, որ Ալեքսանդր Քանանյանի ու կառավարության միջև բանակցությունները վերջապես հասան իրենց ավարտին, ինչի արդյունքում մասնագիտական հանձնաժողովը այսօր գումարեց իր անդրանիկ նիստը, իսկ Ալեքսն էլ քիչ առաջ հայտարարեց հացադուլը դադարեցնելու մասին: Ենթադրում եմ, որ Մհեր Պողոսյանը նույնպես կդադարեցնի հացադուլը»: