Պարոն մարզպետ, ես շատ հարգում եմ Ձեր անուրանալի մասնակցությունը Ախթալայի Խորովածի փառատոնում

Բլոգեր Սեգ Կիրակոսյանը իր բլոգում պատասխանել է Սերժ Թանկյանին ուղղված ՀՀ Լոռու մարզպետ Արթուր Նալբանդյանի նամակին, որը ներկայացնում ենք ստորև.

«Հարգելի պարոն մարզպետ, ես շատ հարգում եմ Ձեր անուրանալի մասնակցությունը Ախթալայի Խորովածի փառատոնում: Մենք բարձր ենք գնահատում նաեւ բնապահպանական գաղափարների չտարածման ուղղությամբ Ձեր ջանքերը: Հուսով եմ իմ այս նամակից հետո ինձ չեք հրավիրի Լոռի, մանավանդ որ ես լոռեցի եմ արմատներով ու հրավիրողներ շատ ունեմ: Սերժին ուղղված Ձեր նամակում տեղակայված դատողությունները հիրավի հուզիչ չեն, մասնավորապես մի քանի պատճառներով.

1. Ես կնախընտրեի կարդալ թեկուզ պակաս ճարտար բառերով, բայց Ձեր գրած տեքստը, այդպես ավելի անկեղծ կստացվեր: Օրինակ ձեր նախադասություններից մեկի շարունակությունը կարելի էր փոխել այսպես' «Ես համաձայն եմ քեզ հետ. քաղաքակրթության առաջընթացն անթույլատրելի է, եթե տեղի է ունենում բնության ավերման գնով: Բայց ախր մենք ընդամենը մի փոքր սար ենք ոչնչացնում, կողքն էլ մի փոքրիկ պոչամբարիկ սարքենք, մի քիչ էլ կողքից թեղուտի անտառի մնացած հատվածները կչորանան, ու վերջ»:

2. Սերժը տեսաուղերձը Ձեզ չէր հասցեագրել, Դուք էլ ինձ չէիք հասցեագրել Ձեր նամակը, դրա համար ես պատասխանում եմ Ձեր նամակին, դուք էլ պատասխանել էիք Սերժի նամակին…

3. Դուք գրել էիք, որ. «Հանքարդյունաբերությունն այսօր Հայաստանի տնտեսության հենասյունն է եւ իրական հատվածի առաջատարը»: Վահե՞, սրա հեղինակը դու ե՞ս (Վահեն ժամանակակից ֆանտաստ գրող է): Վահե ջան, բա դու չգիտեի՞ր, որ 2010թ. պետական բյուջեի եկամտային մասը եղել է 742 միլիարդ դրամ (մոտ 2 միլիարդ դոլլար), որի ընդամենը 1.37%-ն է գոյանում հանքարդյունաբերությանից:

4. «Բարեկեցիկ եւ հզոր հայրենիք կառուցելու մեր առավել արդյունավետ ճանապարհը հայրենի հողի ու ընդերքի հարստությանն ապավինելն է, մեր նախնիների օրինակով՝ քարից հաց քամելը»: Իսկապես, հանքափորի աշխատանքով 60-80 հազար դրամ ստանալը կարելի է անվանել «քարից հաց քամել»: Շնորհակալություն, որ աֆրոամերիկացիների նախնիներին չեք հիշել: Ի դեպ, մեր նախնիների հացից քար քամող արտադրամասերն օֆշորային գոտիներում չէին գրանցված: Մեր նախնիների օրինակով ավելի ճիշտ չի՞ լինի ապագա սերունդների մասին մտածելը (Խոսքս միայն բաժնետերերի ընտանիքների ապագա սերունդների մասին չէ միայն): Իսկ դուք տեղյա՞կ եք, որ Լոռվա մարզում պոչամբարներն այնքան են լցվել, որ պոչանքները դուրս են ծորում… ահա այդ կադրերը:

5. Գրել էիք. «Արվեստի բարձրունքներից հնչող քո ձայնը լսելի է շատերին եւ շատ բան կարող է փոխել մարդկանց մտքերում եւ սրտերում»: Ձեր հաջորդ նամակում կսպասեմ մտքերի փոփոխությունների, եթե այս բանաձևն իսկապես գործում է…

6. Պարոն մարզպետ, ի՞նչ էիք ակնկալում այս նախադասությունը գրելիս. «Ուրախ կլինեմ, եթե հնարավորություն գտնես ինձ հետ միասին քննարկել ինչպես այս ծրագրի մանրամասները, այնպես էլ ընդհանրապես մարզի զարգացմանն առնչվող՝ քեզ հուզող ցանկացած հարց»: Խնդրում եմ, երբ Սերժը հյուրընկալվի ձեզ մոտ, թույլ չտաք որ նա այցելի նաև Վանաձորի քաղաքապետին: Ասում են, նա ջերմությունն արտահայտելու յուրատիպ ձև ունի»:

Պարոն մարզպետ, Ձեր գրած նամակի մասին Սերժ Թանկյանը վաղուց մի երգ է գրել, որն էլ շատ պատահաբար ես օգտագործել եմ Թեղուտի մասին պատմող իմ տեսանյութերից մեկում:»

Հիշեցնենք, որ օրերս Սերժ Թանկյանը հանդես էր եկել տեսաուղերձով՝ ի պաշտպանություն Թեղուտի, որը ներկայացնում ենք ստորև.