Հիանում ենք քաղաքացիական պայքարին մասնակցելու իր եռանդով. քաղաքական գործիչները՝ Երվանդ Մանարյանի մասին

Այսօր ՀՀ արվեստի վաստակավոր գործիչ, կինոյի և թատրոնի դերասան, բեմադրիչ, սցենարիստ Երվանդ Մանարյանի ծննդյան օրն է: Լուրեր.com-ը զրուցեց քաղաքական-հասարակական գործիչների հետ և նրանցից կարծիք-գնահատական խնդրեց Երվանդ Մանարյանի բազմամյա գործունեության և ներդրումների մասին: Վերջում զրուցեցինք նաև մեծանուն դերասան Մանարյանի հետ:

Քաղաքական գործիչները, սիրով շնորհավորելով մեծանուն դերասանին, առանձնակի ողջունեցին այն հանգամանքը, որ պարոն Մանարյանն ունի ակտիվ քաղաքացիական դիրքորոշում:

Հայ ազգային կոնգրես խմբակցության պատգամավոր Լևոն Զուրաբյանն ասաց, որ շատ խորհրդանշական է, որ տաղանդն ու քաղաքացիական դիրքորոշումը համընկնում են:

«Այն մարդիկ, որոնք կայացել են, որոնք մեր մշակույթի տիտաններն են, առաջին հերթին այն մարդիկ են, որոնք ժողովրդի ձայնն են հասցնում բոլորին: Ես ոչ մի պատահականություն չեմ տեսնում, որ տաղանդավոր դերասանը, մեր մշակույթի մեծությունն այսօր նաև քաղաքականապես է ակտիվ, ժողովրդի կողքին է և պայքարում է մեր երկրում ժողովրդավարության հաստատման համար»,- ասաց Զուրաբյանը:

«Ժառանգություն» կուսակցության ներկայացուցիչ, Կրթության ազգային ինստիտուտի փոխտնօրեն Անահիտ Բախշյանն էլ նշեց, որ Մանարյանի օրինակը մեզ համար շատ կարևոր է. «Նրա օրինակը՝ հատկապես քաղաքացիական համարձակության տեսանկյունից, շատ կարևոր է: Բոլորս հրաշալի հիշում ենք իրեն որպես մշակույթի գործիչ, որպես դերասան, այն դերերը, կերպարները, որոնք ստեղծել է: Ես անչափ տպավորված եմ: Նրան մաղթում եմ երկար, առողջ կյանք՝ մշտապես լինելու քաղաքացիական հասարակության ցանկացած նախաձեռնության կենտրոնում: Երջանիկ եմ, որ իր ժամանակակիցն եմ»:

«Բարգավաճ Հայաստան» կուսակցության ԱԺ խմբակցության քարտուղար Նաիրա Զոհրաբյանն էլ նշեց, որ Երվանդ Մանարյանն իր մանկական հիշողությունների ամենասիրելի դերասաններից է:

«Այն աննկարագրելի կոլորիտային մթնոլորտը, որում մենք մեծացել ենք, այսօր էլ անջնջելի է: Այսօր էլ ես հաճույքով նայում եմ այն ֆիլմերը, որտեղ Երվանդ Մանարյանի անկրկնելի մասնակցությունը կա: Ես շատ ավելի կարևոր եմ համարում, որ ցավոք սրտի՝ մեզանում մտավորականի կերպարը շատ հաճախ դեգրադացվել է, և այսօր հատուկենտ մտավորականներ կարելի է հաշվել, որոնք ունեն իրապես քաղաքացիական դիրքորոշում: Երվանդ Մանարյանն այդ եզակիներից է»,- ասաց Զոհրաբյանը և հավելեց, որ անկախ նրանից՝ ինքը Մանարյանի արտահայտած գնահատականներին համաձայն է, թե ոչ, բայց մեկ բան ակնհայտ է և շատ գնահատելի՝ մտավորականը վախվորած չէ, մտավորականը կաշկանդված չէ իր կարծիքը հայտնելու մեջ:

«Երվանդ Մանարյանն այն եզակիներից մեկն է, այսինքն՝ մարդ-քաղաքացի, որը իրապես շատ կարևոր է: Դա անչափ գնահատելի է մեր օրերում, երբ մտավորականներից շատերն ուղղակի դեգրադացված են և նրանց մտավորական կոչել պարզապես չես կարողանում»,- եզրափակեց Զոհրաբյանը:

Սլավոնական համալսարանի «Քաղաքականություն և իրավունք» ինստիտուտի տնօրեն Լարիսա Ալավերդյանն էլ ասաց, որ ուրախանում է, երբ բողոքի ալիքներում տեսնում է պարոն Մանարյանին. «Վերին աստիճանի պարծենում եմ, որ մեր մտավորականությունը կարողացել է իր շարքերում ունենալ իրոք մտավորականի, այնպիսին՝ ինչպիսին է պարոն Մանարյանը: Ես ուղղակի հիանում եմ քաղաքացիական պայքարին մասնակցելու իր եռանդով, ես ուրախանում եմ, երբ տեսնում եմ, որ բողոքի ալիքներում նա միշտ ներկա է: Ես ցանկանում եմ իրեն այդ երիտասարդական ուժն ու եռանդը, այդ քաղաքացիական խիզախությունը, որին կարող են նախանձել շատուշատ երիտասարդներ»,- ասաց Ալավերդյանը:

Լուրեր.com-ը զրուցեց նաև մեծանուն դերասան Երվանդ Մանարյանի հետ: Շնորհավորելով ծննդյան տարեդարձի կապակցությամբ՝ Լուրեր.com-ը խնդրեց պարոն Մանարյանին հայտնել իր ցանկությունը այսօրվա երիտասարդությանը։

«Կցանկանամ, որ երիտասարդությունը վստահաբար իմանա, որ իր երկրից, հայրենիքից դուրս ոչ մի ավելի կարևոր, ավելի ամուր հիմք իր ոտքի տակ ունենալ չի կարող: Արդեն իսկ պետք է դրա մասին մտածել, որովհետև տարիները կանցնեն, հետո դառնություններ կգան և ժամանակ չի լինի, հնարավորությունը չի սահմանել այդպիսի ձև, որ վերադառնաս և սխալներդ ուղղես: Տա՛ Աստված, որ նրանցից ոչ ոք այդ հարցում չսխալվի, միշտ կանգնած լինի իր հայրենիքի դիրքերում»,- ասաց Մանարյանը:

Գայանե Համբարձումյան