«Հետաքրքրությունը» Երկիր է ուղարկել Մարսի առաջին գունավոր լուսանկարները

MSL Curiosity («Հետաքրքրություն») մարսագնացը Երկիր է ուղարկել Մարսի՝ իր հիմնական Mastcam տեսախցիկով արված առաջին գունավոր լուսանկարները և սկսել է Գեյլ խառնարանի երկրաբանական տվյալների հավաքագրումը։ Այս մասին հաղորդվում է NASA-ի պաշտոնական կայքում։

NASA-ի մասնագետները բարեհաջող ավարտել են Mastcam-ի տեխնիկական պատրաստության զննումը և ստացել առաջին 130 գունավոր մանրալուսանկարները, որոնցից և կազմվել է ներկայացվող համայնապատկերը։ Մեծամասշտաբ լուսանկարները Երկիր կհաղորդվեն կապի հաջորդ սեանսի ընթացքում։ Ներկայացվող լուսանկարները, ի տարբերություն նախկին մարսագնացների հաղորդած կեղծ-գունային պատկերների, առաջինն են, որ ներկայացնում են Մարսի մակերևույթն իրական գույներում։

Համայնապատկերում կարելի է տեսնել Գեյլի խառնարանի՝ վայրէջքի ընթացքում օդային ամբարձիչի կողմից խոտորված գրունտը։ Մեկ այլ համայնապատկերում, նկարահանված Navcam տեսախցիկով, երևում են մարսագնացի վրայի փոշին և որոշ մանր քարեր։ Ինժեներների խոսքերով՝ դրանք չեն կարող խաթարել սարքի աշխատանքը։

Ավելին, մարսագնացն իրականացրել է գիտական սարքավորման լրացուցիչ ստուգում։ Զննվել են APXS սպեկտրաչափը, CheMin քիմիական անալիզատորը, գրունտի նմուշների վերլուծության SAM սարքը, ռուսական արտադրության նեյտրոնային DAN անալիզատորը։ Բոլոր թեստերը, NASA-ի մասնագետների պնդմամբ, բարեհաջող են անցել։ Դրանից բացի, ինժեներները ներբեռնել են սարքի ծրագրային ապահովման համար անհրաժեշտ ինֆորմացիան, որը կթարմացվի Մարսի վրա աշխատանքի հինգերորդ օրը։

«Հետաքրքրությունը» Գեյլի խառնարան բարեհաջող վայրէջք է կատարել օգոստոսի 6-ին։ Այն նախատեսված է Կարմիր մոլորակի երկրաբանական ուսումնասիրության և նրա վրա կյանքի առկայության հետքերի փնտրման համար։ Մարսագնացի հիմնական խնդիրներից է մոլորակի մակերևույթային և ենթամակերևութային գրունտի քիմիական բաղադրության վերլուծությունը։