Մեկնարկում է «Կին» միջազգային 8-րդ կինոփառատոնը

ՀՀ մշակույթի նախարարության աջակցությամբ «Լիզա» հիմնադրամը` ս. թ. դեկտեմբերի 1-5-ը, Երևանի պետական տիկնիկային թատրոնում անցկացնում է «Կին» միջազգային 8-րդ կինոփառատոնը:

Արդեն ավանդական դարձած այս կինոփառատոնը նպատակ ունի վերաիմաստավորելու կնոջ տեղն ու դերը հասարակության մեջ, կինոյի միջոցով վեր հանելու նրա խնդիրները, նպաստելու Հայաստանում կանանց կողմից ֆիլմերի ստեղծմանը, նոր անունների բացահայտմանը, ինչպես նաև` տարբեր ազգերի մշակույթների փոխընկալմանը: 
Այս տարի «Կին» փառատոնում ընդգրկվել են 16 երկրների` 52 ֆիլմեր: Փառատոնը բաղկացած է 4 ծրագրերից` 
• մրցութային,
• հյուրերի,
• երիտասարդական (փառատոնի երիտասարդական մրցույթի ծրագրերից), 
• հետահայաց ցուցադրություն (լիտվացի հայտնի վավերագրող Յանինա Լապինսկայտեի ֆիլմերից): 
Փառատոնի շրջանակներում կանցկացվեն վարպետության դասեր, ինչպես նաև, կին ռեժիսորների համար` ուսուցողական պարապմունքներ, որոնք կվարեն «Կանայք ֆիլմեր են նկարահանում» ամերիկյան կազմակերպության ներկայացուցիչներ Դեբրա Ցիմերմանը և Թրեյսի Հոլդերը: 
«Կին» միջազգային 8-րդ կինոփառատոնի հաղթողներին կշնորհվեն «Լավագույն ֆիլմ», «Հատուկ մրցանակ», «Լավագույն դեբյուտ» մրցանակները և դիպլոմներ:
«Կին» միջազգային 8-րդ կինոփառատոնի հյուրերն են՝ Յանինա Լապինսկայտեն (վավերագրող, Լիտվա), Անդրեա Վինկը (goEAST փառատոնի ծրագրի ղեկավար, Գերմանիա), Դեբրա Ցիմերմանը, Թրեյսի Հոլդերը («Կանայք նկարահանում են ֆիլմեր» կազմակերպություն, ԱՄՆ»: