Դպրոցներում, թատրոններում աշխատավարձեր չեն ստացել

ԿԳՄՍ նախարարության ենթակայության տակ գտնվող հիմնարկների աշխատակիցները հունվար ամսվա աշխատավարձ չեն ստացել։ ԼՈՒՐԵՐ․com-ը կապ է հաստատել մի քանի դպրոցների ու թատրոնների հետ՝ պարզելու՝ արդյոք իրենց աշխատակիցները ստացել են աշխատավարձ, թե՞ ոչ։

Մեզ հետ զրույցում Երևանի թիվ 168 և թիվ 80 հիմնական դպրոցներից հաստատեցին տեղեկությունը, որ դպրոցի աշխատակազմը դեռևս աշխատավարձ չի ստացել։ Նույն պատասխանը ստացանք նաև Հակոբ Պարոնյանի անվան և «Գոյ» թատրոններից։ Բոլորը միաբերան նշեցին՝ սա առաջին դեպքը չէ, հունվար ամսին աշխատավարձի ուշացման խնդիր է առաջանում։

Հետաքրքրվեցինք՝ արդյո՞ք այս հարցով դիմել են նախարարություն, ի՞նչ մեկնաբանություն  են ստացել, ի պատասխան՝ ոմանք ասացին, որ չեն դիմել նախարարություն, որոշներն էլ նշեցին, թե իրենք չեն զբաղվում այդ հարցերով և տեղյակ չեն՝ արդյոք իրենց հաստատությունից դիմել են որևէ տեղ, թե ոչ։ 

Հիշեցնենք, որ լրատվամիջոցներից մեկի հետ զրույցում Ֆինանսների նախարարությունից պարզաբանել են․ «Երբ ֆինանսների նախարարությունը ստանում է ֆինանսավորման հայտ, ավտոմատ կերպով գանձապետարանից կատարում է փոխանցումը։ Չի կարող ֆինանսների նախարարությունը հայտ ստանալ, եւ այն ուղղակի մնա, քանի որ դա ավտոմատ համակարգ է»։

ԿԳՄՍ նախարարությունից են հայտնել են, որ աշխատավարձերի ուշացումը համատարած բնույթ չի կրում․ «Բացի դա, նրանք օրենքով կարող են մինչև փետրվարի 15-ն աշխատավարձ ստանալ։ Եթե նման խնդիր կա, կարող են զանգահարել նախարարության թեժ գծին և ասել, որ, օրինակ՝ այսինչ դպրոցում կամ այլ կազմակերպությունում աշխատավարձ չեն ստացել, ըստ այդմ էլ կփորձեն հասկանալ, թե որն է խնդիրը»: