ՀՀ մասնակցությունը Եվրասիական միությանը կլինի առնչություն, բայց ոչ անդամակցություն. Ստյոպա Սաֆարյան

Սարգսյան-Պուտին հանդիպման ժամանակ Եվրասիական միության թեմայի արծարծման բացակայության վերաբերյալ  Lurer.com–ը զրուցեց «Ժառանգություն» կուսակցության գլխավոր քարտուղար, վերլուծաբան Ստյոպա Սաֆարյանի հետ։

-Ինչու՞ պաշտոնական անդրադարձ չեղավ Եվրասիական միությանը Հայաստանի հնարավոր անդամակցության հարցին։

Պուտին-Սարգսյան հանդիպմանը քննարկվել են, ինչպես իրենք են նշել, ԱՊՀ տարածքում ինտեգրացիոն խնդիրները և Հայաստան-Ռուսաստան համագործակցության հարցերը։ Հավանաբար՝ ինտեգրացիա ասելով պետք է հասկանալ Եվրասիական միությունը և Հարավային Կովկասի անվտանգությունը։ Պուտինը լրագրողների հետ հանդիպմանը ասել է, որ բանակցություններ են սկսվում Մաքսային միությանը անդամակցելու հարցով։ Քննարկվել է, թե ինչպես արվի, որ Հայաստանը այս կերպ միանա և օգտվի Բելառուսի, Ղազախստանի և Ռուսաստանի նախագահների պայմանավորվածություններից։ Խոսքը վերաբերում է ոչ թե Հայաստանի ուղղակի կամ անուղղակի անդամագրությանը, այլ այդ ուղեծրի վրա Հայաստանի համար նախատեսված տեղին։

-Եթե ամփոփելու լինենք՝ բովանդակային առումով ինչ պարզվեց Պուտին-Սարգսյան հանդիպմանը։

Համենայն դեպս Հայաստանը հստակ պատասխան չի տվել, և կարծեք այն ավելի շատ ոչ է, քան՝ այո։ Եթե անգամ Հայաստանը միանա Եվրասիական միությանը, ապա դա կլինի ինչ-որ ֆորմատներում ուղղակի մասնակցություն ապահովելով և ոչ ավելին։ Հայաստանը դրել է արդեն այդ շեմը, որից այն կողմ չի կարող անցնել, որովհետև կազդի Եվրապայի հետ հարաբերություների վրա։ Հայաստանի մասնակցությունը Եվրասիական միությանը կլինի առնչություն, սակայն  չի լինի անդամակցություն։