Ալեն Դելոնը կխաղա Սարիկ Անդրեասյանի ֆիլմում. ֆոտոշարք

Ալեն Դելոնը նորից նկարահանման հրապարակում է։ Վերջին տարիներին Ալեն Դելոնը հազվադեպ էր համաձայնում խաղալ ֆրանսիական ու արտասահմանյան կինոռեժիսորների ֆիլմերում, բայց մեծ պատրաստակամությամբ համաձայնել է նկարահանվել ռուսական ֆիլմում։ Մարդկության լավագույն կեսի կուռքը այս անգամ խաղալու է ինքն իրեն ռուսական «Շնորհավոր նոր տարի, մայրե՛ր» ֆիլմում, որի առաջնախաղը կկայանա դեկտեմբերին՝ Մոսկվայում։ «Ինձ հաճելի է խաղալ հենց ռուսական կինոյում»,- ИТАР-ТАСС-ի հետ զրույցում նշել է դերասանը,-«Ես շատ եմ սիրում Ռուսատանը, նրա մշակույթը և մեծ սիրով ընդունել եմ ռուսական կոլեգաների հրավերը»։ Ֆրանսիական նովելի նկարահանումները տեղի են ունեցել Փարիզի կենտրոնում գտնվող շքեղ «Лютеция» հյուրանոցում։

Ֆրանսիական կինոյում դեմք համարվող դերասանի մուտքը նկարահանման հրապարակ ընդունվել է ծափահարություններով ու մեծ ոգևորությամբ։ Դելոնը միանգամից մտել է ստեղծագործական գործընթացի մեջ ու նկարահանման հրապարակում գործողությունների ծավալման շուրջ տվել է մի քանի խորհուրդ։ «Մի քիչ արագ խաղանք ու երաժշտությունը ավելի շուտ թող հնչի»,- ասել է դերասանը։ Ճշգրիտ ու էլեգանտ. այսպիսին է դերասանի խաղը, որը ֆիլմի առանցքային դրվագին հաղորդել է անկրկնելի հմայք։ Վարպետը հրաշալի էր Իրինա Ռոզանովայի հետ պարելիս։ Նկարահանող խումբը, հյուրերն ու հյուրանոցի աշխատակիցները շունչները պահած հրաշքի ականատես էին։ «Մենք բոլորս Ձեզ սիրում ենք, մերսի, Ալե՛ն»,-ասել է Ռոզանովան իր մարմնավորած կերպարի խոսքերով։ Համաձայն նովելի սյուժեի, որը նկարահանում է Սարիկ Անդրեասյանը, հերոսուհուն Փարիզ է բերում նրա որդին։ Այս ուղևորության անակնկալը սիրելի դերասանի հետ հանդիպումն է մայրաքաղաքի սրճարաններից մեկում։

«Ես անպայման կգամ առաջնախաղին»,- ասել է Դելոնը,- «Շատ եմ սպասում ռուսական հանդիսատեսի հետ հանդիպմանը»։
45 տարի կինոյում լինելով՝ Ալեն Դելոնը խաղացել է ավելի քան 100 ֆիլմում, որոնցից շատերը դարձել են պաշտելի։