Թուրքիայում Էրդողանին վիրավորելու համար քաղցկեղով հիվանդ կնոջ են ձերբակալել

Թուրքիայում ձերբակալել են քաղցկեղով հիվանդ կնոջ` նրան մեղադրելով երկրի նախագահ Ռեջեփ Թայիփ Էրդողանին վիրավորելու և ահաբեկչական կազմակերպության օգտին քարոզչություն անելու համար: Այս մասին տեղեկացնում է demokrathaber.org կայքը:

Շվեյցարիայից Թուրքիա վերադարձող Այթեն Սարըքայա Քեսլերին ձերբակալել են Ստամբուլի օդանավակայանում, երբ անձնագրային ստուգում անցնելիս պարզվել է, որ նրա վերաբերյալ ձերբակալման որոշում կա:

Ձերբակալությունից հետո կնոջը տեղափոխել են Ստամբուլի արդարադատության պալատ, որտեղ նրա ինքնազգացողությունը վատացել է, նա կորցրել է գիտակցությունն ու շտապօգնության մեքենայով տեղափոխվել է հիվանդանոց:

Չնայած Քեսլերի ծանր վիճակին` նրա նկատմամբ կալանավորման որոշում է կայացվել: Նրա փաստաբան Գյուլիզար Թունջերը հայտարարել է, որ իր պաշտպանյալի հիվանդությունը սրվել է, իսկ նրա նկատմամբ կալանավորման որոշում կայացնելիս դատավորները հաշվի չեն առել նրա առողջական վիճակի անհամատեղելիությունը կալանքի հետ:

Փաստաբանը տեղեկացրել է, որ բացի քաղցկեղից, իր պաշտպանյալը ևս մի քանի լուրջ հիվանդություն ունի: