«Մանկական Եվրատեսիլ 2011»–ում Սիրուշոն կներկայացնի «Քելե-քելե» երգի ռեմիքսը

Գիտություն և Մշակույթ 2 Դեկտեմբեր, 2011 11:24

«Մանկական Եվրատեսիլ 2011»-ում հատուկ հյուր երգչուհի Սիրուշոն վստահ է, որ դեկտեմբերի 2-ին եւ 3-ին հանդիսատեսին սպասում է մեծ, հիանալի շոու: Այս մասին Մարզահամերգային համալիրում դեկտեմբերի 1-ին հայ եւ արտերկրի լրագրողների հետ հանդիպմանը նշեց երգչուհին:

«Երբ ինձ առաջարկեցին մասնակցել «Մանկական Եվրատեսիլ 2011»-ին, խորհրդակցեցի հայրիկիս հետ, եւ նա ինձ տվեց ելույթում «Բերդ» պարի գաղափարը»,- «Արմենպրես» լրատվական գործակալության փոխանցմամբ ասել է երգչուհին՝ հավելելով, որ միշտ ցանկացել է՝ «Բերդ»-ն իր ելույթներից մեկում ներկայացվի:

«Մի քանի օր առաջ երբ մտածում էի, թե ինչ կցանկանայի տեսնել բեմում, ես երեկ փորձի ժամանակ հասկացա, որ սա այդ ամենի իրականացումն է, նույնիսկ կարելի է փշաքաղվել»,- պատմեց Սիրուշոն: Նրա խոսքով՝ կարեւոր է այն ամենը, ինչ-որ տեղի է ունենում՝ անգամ փոքր թերությունները, որոնց հետ հանդիսատեսը կամ ինքը չհամաձայնեն, այդքան էական չեն:

«Կարեւոր է այն առիթը, երաժշտական մեծ տոնը, հիանալի, ուրախ ծրագիրը, որ լինելու է բեմում: Փորձենք ուրախանալ դրանով, ոչ թե թերություններ փնտրենք»,- ընդգծեց երգչուհին: Անդրադառնալով մրցույթի «Հասի՛ր բարձունքին» կարգախոսին եւ սարեր պատկերող էկվալայզեր տարբերանշանին, երգչուհին նշեց, որ առանձնակի սեր է տածում ազգային խորհրդանիշների հանդեպ:

Սիրուշոն «Մանկական Եվրատեսիլի 2011» մրցույթում կկատարի Հայաստանում եւ Եվրոպայում մեծ ճանաչում եւ երգչուհուն հաջողություն բերած «Քելե-քելե» երգի ռեմիքսային՝ նորովի մշակված տարբերակը: Երգչուհին խոստովանեց, որ հեղինակավոր այս մրցույթի՝ Հայաստանում անցկացումն իր մեծ ցանկություններից էր:

«Շատ ուրախ եմ այսօր այստեղ տեսնել եվրոպական շրջագայություններից ծանոթ լրագրողների, մարդկանց, եւ հույս ունեմ, որ նրանք կտեսնեն բոլոր այն դրական կողմերը, որն ունի մեր երկիրը»,- նշեց Սիրուշոն, ով վստահ է, որ հայ հանդիսատեսը տարբերվում է իր առանձնակի ջերմ վերաբերմունքով: Երգչուհին չբացառեց մեծերի «Եվրատեսիլ»-ում իր մասնակցությունը՝ մեջբերելով «Երբեք մի՛ ասա երբեք» արտահայտությունը:

Սիրուշոն ավելացրեց, որ, ի տարբերություն մեծերի «Եվրատեսիլ»-ի, մանկականում շատ դժվար է ֆավորիտներ ունենալը, քանի որ մասնակից բոլոր երիտասարդ արտիստներն էլ շնորհալի եւ գեղեցիկ են յուրովի: Երգչուհին մաղթեց հանդիսատեսին բավականություն եւ անկրկնելի տպավորություններ կայանալիք մրցույթից: