Ֆրիդրիխ Էբերթ հիմնադրամը պատրաստ է աջակցություն ցուցաբերել Հայաստանին փոփոխությունների ճանապարհին

Բեռլինում ԳԴՀ կանցլեր Անգելա Մերկելի հետ հանդիպումից հետո ՀՀ վարչապետ Նիկոլ Փաշինյանի հաջորդ կանգառը Ֆրիդրիխ Էբերթ հիմնադրամում էր։ Հիմնադրամում վարչապետը մասնակցեց ԳԴՀ գիտական, փորձագիտական շրջանակների հետ՝ «Տևական համագործակցության նոր նախանշանների ներքո, Հայաստան-Գերմանիա հարաբերություններ» խորագրով հանդիպմանը։

Հիմնադրամի համանախագահ Կլարա Գեյվիցն իր ողջույնի խոսքում նշեց, որ ուրախությամբ է հյուրընկալում ՀՀ վարչապետ Նիկոլ Փաշինյանին։ «Հայաստանը միշտ եղել է տարբեր մշակույթների խաչմերուկում, սակայն պահպանել է իր ինքնությունը։ Այսօր էլ Հայաստանը քաղաքական կարևոր դերակատարում ունի։ Տեսնում ենք, որ բարի դրացիական հարաբերություններ ունի Ռուսաստանի հետ, ԵԱՏՄ֊ի անդամ երկիր է և միաժամանակ ԵՄ֊ի հետ ունի ստորագրած համապատասխան համաձայնագիր»,- ասաց Կլարա Գեյվիցը։

Նա արձանագրեց, որ Գերմանիան լավ հարաբերություններ ունի Հայաստանի հետ և կարևոր է համարում համագործակցության խորացման հնարավորությունները։ Կլարա Գեյվիցը նկատեց, որ Հայաստանը կարող է դառնալ գրավիչ երկիր արտասահմանյան ներդրողների համար։ Նա կարևոր համարեց պետությունը տնտեսապես ավելի կայուն դարձնելու ծրագրերը, աշխատատեղերի ստեղծումը։

«Նոր կառավարությունը, ստանձնելով պարտավորություններ, առճակատվում է հին բեռի հետ։ Համոզված ենք, որ դյուրին չէ փոփոխություններին հասնելը, և մենք կարող ենք մեր նպաստը բերել այդ զարգացումներին», - ֊ասաց Կլարա Գեյվիցը։

Նա նկատեց, որ հիմնադրամն ունի ներկայացուցչություն Հայաստանում և տարբեր միջոցառումների շրջանակում իր աջակցությունն է ցուցաբերել Հայաստանին։ Կլարա Գեյվիցն ընդգծեց, որ հիմնադրամում անցկացվող այս հանդիպումը լավ հնարավորություն է համագործակցությունը խորացնելու առումով։