«Առավոտ». Վրաստանի Ուշբա լեռը բարձրացած հայ լեռնագնացը 2 օր է` փրկարարական օգնության է սպասում

Վրաստանի Ուշբա լեռը բարձրացած հայ լեռնագնաց Անդրանիկ Միրիբյանը արդեն 2 օր է փրկարարական օգնության է սպասում, բայց վստահ չէ, որ այն կհասնի:

Նա հեռախոսակապ է հաստատել իր հարազատների հետ և հայտնել, որ ձյան առատ տեղումների պատճառով իր վիճակը գնալով բարդանում է, իսկ սննդի և ջրի պաշարը՝ սպառվում: Անդրանիկ Միրիբյանը, ով նախկին փրկարար է, կապվել է թե Վրաստանի, թե Հայաստանի փրկարար ծառայությունների հետ և խնդրել իր հետևից ուղղաթիռ ուղարկել, քանի որ ոտքով փրկարար լեռնագնացներ ուղարկելը չափազանց վտանգավոր է, բացի այդ, ոտքով Ուշբա սար հասնելու համար Սվանեթիի փրկարարներին անհրաժեշտ է 3 օր: Լեռնագնացին, սակայն, ոչ ոք հստակ չի ասել' եղանակային բարենպաստ պայմանների դեպքում ուղղաթիռ կգնա՞ նրա հետևից, թե՞ ոչ:

«Ես պատրաստ եմ այստեղ 2-3 գիշեր սպասել, եթե պետք լինի, 1 շաբաթ էլ այստեղ կմնամ՝ սոված-ծարավ, միայն թե վստահ լինեմ, որ ուղղաթիռ կուղարկեն: Եթե ոչ, ապա անհիմն հույսեր տալով նրանք կարող են սպառել իմ միջոցները, որոնք շատ սուղ են, ու ես կհայտնվեմ կրիտիկական վիճակում, երբ այլևս ոչինչ հնարավոր չի լինի անել: Այսինքն ինձ համար այս պահին ամենակարևոր հարցն է՝ կլինի՞ ուղղաթիռ, թե ոչ: Դրանից կախված էլ որոշում կընդունեմ:

Ես պատրաստվում եմ ծայրահեղ քայլի գնալ ու ռիսկի դիմելով վաղը առավոտյան ժամը 5-6-ին փորձելու եմ իջնել ներքև, քանի որ համոզված չեմ, որ ուղղաթիռ կլինի: Չէի ուզի, որ ինձ համար այլ փրկարարներ վտանգեին իրենց կյանքը՝ փորձելով եղանակային այսպիսի պայմաններում բարձրանալ լեռը: Դրա համար ուղղաթիռը լավագույն տարբերակն է' մարդկային կյանքի ռիսկի գործոնը նվազեցնելու համար»,- հարազատներին ասել է Անդրանիկ Միրիբյանը:

Ըստ նրա՝ որքան փրկարարներն ուշանում են, այնքան իջնելն իր համար վտանգավոր է դառնում: Առատ ձյունը ձնահյուսի վտանգ է ստեղծում: Նա նաև փոխանցել է, որ պատրաստ է վճարել ուղղաթիռով փրկարարական ծառայության դիմաց: