Թուրք գրող Ասլը Էրդողանը Թուրքիայում տիրող համակարգը բնորոշել է որպես «ֆաշիզմ և նեոֆաշիզմ»

Գերմանիայում բնակվող թուրք գրող Ասլը Էրդողանը հայտարարել է, որ մտադիր չէ վերադառնալ Թուրքիա: Այս մասին տեղեկացնում է demokrathaber.org կայքը` հղում անելով Agence France-Press լրատվական գործակալությանը:

Էրդողանը 2016 թվականի հուլիսի 15-ին Թուրքիայում տեղի ունեցած հեղաշրջման փորձից հետո փակված Özgür Gündem թերթի դեմ ընթացող դատավարության շրջանակներում մեղադրվել էր «պետության միասնականությունն ու ամբողջականությունը խարխլելու» և «զինված ահաբեկչական խմբավորման անդամ լինելու» մեջ:

Թուրք գրողը կալանավորվել էր 2016 թվականի օգոստոսին: Նույն թվականի նոյեմբերին նա արդարացվել էր «պետության միասնականությունն ու ամբողջականությունը խարխլելու» մեղադրանքի մասով, բայց շարունակել էր կալանքի տակ մնալ մյուս մեղադրանքով: Նա ազատ է արձակվել 133 օր կալանքի տակ մնալուց հետո:

Երկու  տարի Գերմանիայում բնակվող գրողը նշել է, որ իր համար անակնկալ էր ազատ արձակման որոշումը:

«Անկեղծ` ես շատ զարմացա: Գրեթե բոլորը համոզված էին, որ ես պատիժ կստանամ: Ներիկա պահին, հաշվի առնելով բանտարկվելու վտանգը, չեմ կարող վերադառնալ: Եվս մեկ կալանավորվելն ինձ համար հավասար կլինի մահվան»,-նշել է գրողը` Թուրքիայում տիրող համակարգը անվանելով «ֆաշիզմ» և «նեոֆաշիզմ»:

Ասլը Էրդողանի գրքերը թարգմանվել են տարբեր լեզուներով: 2018 թվականին գրողը արժանացել է Ֆրանսիացի գրող և փիլիսոփա Սիմոնա դը Բովուարի անվան մրցանակի: