Գտնվել է ացտեկների քաղաքի սրբազան ծառը

Մեքսիկացի հնագետները Ացտեկյան թագավորության մայրաքաղաք Տենոչտիտլանի Մեծ բուրգի մերձակայքում տարվող պեղումների ընթացքում գտել են 500 տարվա հնության թաղում-դամբարան, ինչպես նաև ացտեկների ռազմի աստված Ուիցիլոպոչտլիի սրբազան ծառը։ Այս գտածոյի մասին պատմող հոդվածը դեռ չի տպագրվել, սակայն այդ մասին հաղորդագրությունը ներկայացնում է artdaily.org-ը։

Դամբարանը հայտնաբերվել է Տենոչտիտլանի Մեծ բուրգի մոտակայքում։ Այն գտնվել է մոտ 5 մետր խորության վրա՝ բազալտե տապանաքարի տակ։ Վերջինս նաև կառույցի հիմք մի մաս է, ինչից կարելի է եզրակացնել, որ թաղումն այս տեղում իրականացվել է մինչև 1481-1486 թվականերին Մեծ բուրգի կառուցումը։

Գերեզմանն ունի 2 մետր երկարութություն և 65 սանտիմետր լայնություն։ Դրանում գտնվել է երիտասարդ աղջկա կմախք, ինչպես նաև տարբեր տարիքի մեծահասակների և երեխաների մասունքներ։ Ընդհանուր առմամբ, պեղվել է 1789 ոսկոր և 10 մարդու գանգ: Թաղումը հայտնաբերած հնագետների խոսքերով՝ այն բացառիկ է, որովհետև որքան էլ որ անցյալում նման մասսայական թաղումներ հայտնաբերվել են, սա առաջինն է, որում հանդիպում են տարբեր տարիքի մարդկանց մնացորդներ։

Գերեզմանից բացի, հայտնաբերվել է նաև հրաբխային քարից մինչ այդ անհայտ տիպի կառույց, որի ներսում գտնվել է ծառի բուն։ Ըստ հնագետների, այն պատկանում է ռազմի աստված Ուիցիլոպոչտլիին նվիրված սրբազան ծառերից մեկին։ Այս ծառին էր նվիրված նաև քաղաքի կենտրոնական Մեծ տաճարը։

Ավելի վաղ, ժամանակակից Մեխիկոյի կենտրոնում՝ հին Տենոչտիտլանից ոչ հեռու, հնագետները պեղել էին 800-ամյա մի բուրգ, որը փոխել է գիտնականների կարծիքը Տենոչտիտլանի քույր քաղաքի՝ Տլատելոկոյի հիմնադրման տարեթվի մասին։