ԿԲ նախկին նախագահը ներդումների բում չի կանխատեսում. որոնք են պատճառները

«Ընդհանուր առմամբ՝ անցած 2019 թվականը տնտեսական լավ տարի էր։ 7, 8 տնտեսական ցուցանիշը բավականին լավ արդյունք է»,- լրագրողների հետ հանդիպմանն ասաց ՀՀ Կենտրոնական բանկի նախկին նախագահ, տնտեսագետ Բագրատ Ասատրյանը։ Նա նշեց, որ արդյունաբերության աճը պայմանավորված էր հանքարդյունաբերության ծավալի ավելացումով, իսկ, օրինակ, շինարարության աճի տեմպերում կա հետընթաց։ «Ճիշտ է, գնաճը քիչ է, այնուամենայնիվ, այն չարիք է, որի չլինելու դեպքում տնտեսական արդյունքները ավելի դրական կլինեն»։

Նրա հաջորդ դիտարկումն այն է, որ ներկրման ծավալը ավելի մեծ է, քան արտահանման։ «Ցավոք, պետք է նշեմ, որ մենք ֆինանսական գրագիտությամբ չենք փայլում, դրա վառ օրինակը՝ 2019 թվականին ներկրված մեքենաների հարցն է, որոնք ներկրվել են, բայց չեն վաճառվել։ Ու ենթադրում եմ, որ մեկ- երկու տարուց շուտ չեն վաճառվի»։ Ասատրյանը նշեց, որ Հայաստանը պատրաստ չէ լուրջ ներդրումների, թեպետ իշխանությունները շատ են ուզում ինչ -որ բան փոխել. «Լուրջ ու կարևոր անելիքներ ունենք։ Ներդրումների մասով կարող եմ ասել, որ հնարավոր է մեկ-երկու ներդրումներ լինեն, բայց էական ոչինչ չի փոխվի։ Պետք են հստակ լուծումներ, բարենպաստ պայմաններ ներդրողների համար։ Պետությունը պետք է գիտակցի, որ ներդրումների համար ծառայություն է մատուցում, որը պետք է լինի բարձր որակի»։ ԿԲ նախկին նախագահը վստահ է, որ այս տարբերակով մոտակա տարիներին ներդրումների բում չի լինի։