Զինծառայողները Սիրիայի և Հորդանանի սահմանին մարտեր են մղել

Սիրիական ու հորդանանյան զինծառայողները օգոստոսի 11-ին երկու երկրների սահմանին մարտեր են մղել։ Այս մասին հաղորդում է Reuters-ը։ Գործակալության հետ զրույցում սիրիական ընդդիմության ներկայացուցիչ ականատեսը հայտնել է, որ երկու կողմերը կիրառել են զրահատեխնիկա։

Բախումները տեղի են ունեցել Թել Շիհաբ Թուրրայի մերձակայքում, որտեղով Սիրիայի փախստականներն անցնում են Հորդանան։

Ականատեսի վկայությամբ՝ կռիվը սկսվել է սիրիկական մի խումբ փախստականների՝ Հորդանան անցնելու ժամանակ։ Հորդանանի իշխանությունները հաստատել են սիրիական սահմանին բախումների լուրը՝ ավելացնելով, որ հորդանանյան զինյալների թվում վիրավորներ ու զոհեր չկան։ Սիրական կողմը հրաժարվել է մեկնաբանություններ տալուց։

2011 թվականին Սիրիայում Բաշար Ասադի հակառակորդների ու համախոհների միջև սկսված քաղաքացիական պատերազմի պատճառով երկիրը լքել են տասնյակ հազարավոր մարդիկ։ Փախստականների մեծ մասը հաստատվել են Լիբանանում և Թուրքիայում, որոնք չեն փակել սահմանները Սիրիան լքողների առջև։ Իրաքն ու Հորդանանը սիրիական փախստականների առջև սահմանները բացել են միայն 2012 թվականի հուլիսին։ Մինչ այդ սիրիական փախստականները այդ երկրներ մուտք են գործել անօրինական ճանապարհով։

Դեռևս հուլիսին Հորդանանի իշխանությունները հայտնում էին, որ երկրում կար 120 հազար սիրիացի փախստական։ ՄԱԿ-ն էլ իր հերթին հայտարարել է Հորդանան ներգաղթած 20 հազար փախստականների մասին։