Ջեյմս Պատերսոնը՝ 3 տարի անընդմեջ ամենաթանկ վարձատրվող գրող

Համաձայն Forbes-ի հրապարակած տվյալների՝ ամերիկացի Ջեյմս Պատերսոնը 3 տարի անընդմեջ ճանաչվել է ամենաբարձր վարձատրվող գրողն աշխարհում։ Նա հոգեբան Ալեքս Կրոսսի մասին վեպերի հեղինակն է։ 2011 թվականի մայիսից մինչև 2012 թվականի ապրիլը վեպերը Պատերսոնին բերել են 94 միլիոն դոլարի եկամուտ՝ 10 միլիոնով ավելի շատ, քան մեկ տարի առաջ։ Հաշվետու ժամանակամիջոցում Պատերսոնը թողարկել է 11 գիրք։ Նա գլխավորում է ամենահարուստ գրողների ցանկը 2009 թվականին Hachette Book Group տպագրատան հետ 15 միլիոնանոց պայմանգիր կնքելուց հետո։ Հիշեցնենք, որ նա «Եվ եկավ սարդը» , «Աղջիկներին համբուրելիս» գրքերի վաճառքից ստացել է 70 միլիոն դոլարի եկամուտ:

39 միլիոն դոլար եկամուտով երկրորդ տեղը զբաղեցնում է հայտնի Սթիվեն Քինգը։ 33 միլիոն դոլարով երրորդ տեղում է Ստեֆանի Պլամի մասին դետեկտիվի հեղինակ Ջանեթ Իվանովիչը։ Մի տարի առաջ Իվանովիչը 22 միլիոնով 5-րդ տեղում էր։ Չորրոդ տեղում Ջոն Գրիշն է՝ 26 միլիոն դոլարով։ Երեխաներին ու դեռահասներին հասցեագրված վեպերի հեղինակ Ջեֆ Կիննին 25 միլիոն դոլարով զբաղեցնում է 5-րդ տեղը։ Անցյալ տարի երկրորդ հորիզոնականը զբաղեցնող վիպասան Դանիելա Սթիլը այս տարի 23 միլիոն դոլարով զբաղեցնում է ընդամենը 8-րդ տեղը ։ 9-րդ տեղում «Սոված խաղեր» եռագրության հեղինակ Սյուզան Քոլինզն է 20 միլիոն դոլար եկամուտով։ «Մթնշաղեր» գրքի հեղինակ Ստեֆան Մայերը, ով անցյալ տարի զբաղեցնում էր 5-րդ տեղը, այս տարի, վաստակելով 14 միլիոն դոլար, զբաղեցնում է 14-րդ տեղը։ Ամենաբարձր վարձատրվող գրողների ցուցակում հերթական անգամ հայտնվել է Ջոան Ռոուլինգը։ «Հարի Փոթերի» հեղինակը մեկ տարում աշխատել է 17 միլիոն դոլար՝ ներառյալ 8 միլիոն կանխավճարը առաջին անգամ «մեծերի» համար գրված և դեռևս լույս չտեսած գրքի համար։ Ամենաբարձր վարձատրվող գրողների՝ 15 հոգուց բաղկացած ցուցակի վերջին տեղում է «Պերսնի Ջեկսոնն ու օլիմպիացի աստվածները» գործի հեղինակ Ռիկ Ռիոռդանը 13 միլիոն դոլարով։

Forbes-ի ենթադրությամբ՝ 2013 թվականի ամենաբարձր վարձատրվող գրողների ցուցակը գլխավորելու է «Մոխրագույնի 50 երանգներ» եռագրության հեղինակ Է. Լ. Ջեյմսը, ում վեպերը միայն 2012 թվականի գարնանը դարձել են բեսթսելեր (ամենալավ վաճառվողը), բայց չեն մտել վերոնշյալ ցուցակի մեջ։