Ծաղկաձորում մեկնարկեց Ենգիբարյանի անվան մնջախաղի միջազգային 3-րդ փառատոնը

ՀՀ մշակույթի նախարարության աջակցությամբ Երևանի մնջախաղի պետական թատրոնը, Ազգային թատերական ստեղծագործական միավորումը և Ծաղկաձորի քաղաքապետարանը ս. թ. օգոստոսի 10-15-ը Ծաղկաձորում անցկացնում են Լ. Ենգիբարյանի անվան մնջախաղի միջազգային 3-րդ փառատոնը: Փառատոնի բացման հանդիսավոր արարողությունը կկայանա օգոստոսի 10-ին Ծաղկաձորի գլխավոր հրապարակում, փակման արարողությունը՝ օգոստոսի 14-ին նույն վայրում:

Լ. Ենգիբարյանի անվան մնջախաղի միջազգային 3-րդ փառատոնի ծրագրում, ի թիվս մասնակից 7 երկրների փառատոնային ներկայացումների, ներառված են նաև վարպետության դասեր, կկայանա «2 Լեոնիդ 2» ֆիլմի ցուցադրությունը, տեղի կունենա Լ. Ենգիբարյանի արձանի հանդիսավոր բացումը: Այս տարի փառատոնին կմասնակցեն մնջախաղի թատերախմբեր և անհատ մնջախաղացներ Հայաստանից, Դանիայից, Լեհաստանից, Իտալիայից, Ճապոնիայից, Ղազախստանից: Փառատոնի հատուկ հյուրն է Սանկտ Պետերբուրգի թատերական արվեստի ակադեմիայի պրոֆեսոր, արվեստաբանության թեկնածու, մնջախաղային արվեստի մասին մի շարք գրքերի և հոդվածների հեղինակ Ելենա Մարկովան:

Մնջախաղի միջազգային փառատոնը հիմնադրվել է 2008 թվականին և անցկացվում է Ծաղկաձորում երկու տարին մեկ անգամ: 2010 թվականից այն կրում է Լեոնիդ Ենգիբարյանի անունը: Մնջախաղի միջազգային փառատոնի նպատակն է հայ արվեստասերներին ներկայացնել արտերկրի լավագույն մնջախաղի թատերախմբերին և անհատ մնջախաղացներին։ 2008 և 2010 թթ. փառատոնին մասնակցել են թատերախմբեր Իսպանիայից, Իտալիայից, Հունաստանից, Անգլիայից, Ռուսաստանից, Լատվիայից, ԱՄՆ-ից, Ֆրանսիայից, Չեխիայից, ինչպես նաև հայկական թատերական, կրկեսային խմբեր, լարախաղացներ և նվագախմբեր: Մնջախաղի միջազգային 2-րդ փառատոնին իր մասնակցությունն է բերել նաև Լ. Ենգիբարյանի թոռը՝ Պետր Պոպպերը /Չեխիա/: Նախորդ տարիներին ևս փառատոնի շրջանակներում անցկացվել են վարպետության դասեր և գիտաժողովներ։ Փառատոնի ձևաչափի համաձայն ներկայացումները տեղի են ունենում Ծաղկաձորի հրապարակում տեղադրված բացօթյա բեմում և փողոցներում:

ՈՒՇԱԴՐՈՒԹՅՈՒՆ. Երևանի Կոմիտասի անվան կոնսերվատորիայի մոտից կկազմակերպվեն անվճար փոխադրումներ ավտոբուսներով Երևան-Ծաղկաձոր-Երևան երթուղով. օգոստոսի 10-ին՝ ժամը 18:00-ին, մնացած օրերին՝ ժամը 14:00-ին, վերադարձը Երևան՝ ժամը 23:00-ին:

Լրացուցիչ տեղեկությունների համար զանգահարել` 091-61-61-67 հեռախոսահամարով:
Փառատոնի պաշտոնական կայքէջ` www.pantomimefest.com,
ֆեյսբուքյան էջ՝ http://www.facebook.com/pages/Pantomimefest/297825966933312