«ՉԻ». Ինչո՞ւ չի արձագանքում Հայաստանի ԱԳՆ-ն կամ նախագահականը

Հայկական Մամուլ 2 Դեկտեմբեր, 2011 5:27

«Մինչ իշխանական քարոզչամեքենան փորձում է աննկարագրելի դրական լույսի ներքո ներկայացնել Սերժ Սարգսյանի Վրաստան կատարած երկօրյա պաշտոնական այցը, այցի ընթացքում տեղի ունեցած որոշ իրադարձություններ հարցեր են առաջացնում։ Մասնավորապես, ինչպես հայտնի է, Սարգսյանի այցի վերջին օրը նա Վրաստանի նախագահ Միխեիլ Սաակաշվիլու հետ մասնակցել է հայ-վրացական տնտեսական ֆորումին։

Այս ֆորումի ժամանակ ունեցած ելույթում Վրաստանի նախագահը հնչեցրել է գնահատականներ, որոնք զարմանալիորեն անպատասխան են մնացել հայկական կողմից։ Այսպես, ֆորումի ժամանակ Սաակաշվիլին հայտարարել է, թե «այսօրվա դրությամբ մեզ համար ամենացավոտ խնդիրը Հայաստանի եւ Ադրբեջանի առկա հակամարտությունն է»։ «Դա ոչ միայն ողջ Կովկասի, այլ նաեւ Վրաստանի ցավն է»,- ասել է Սաակաշվիլին։ Տարօրինակ է, որ Վրաստանի նախագահի այս հայտարարությանը ոչ միայն տեղում չի արձագանքել Սերժ Սարգսյանը, այլ նաեւ հետագայում` ՀՀ ԱԳՆ-ն։ Ակնհայտ է, որ եթե Վրաստանի նախագահը խնդիրը տեղափոխում է Հայաստանի եւ Ադրբեջանի միջեւ վեճի հարթություն, ապա ավտոմատ կերպով Հայաստանին հռչակում է ագրեսոր, քանի որ խնդիրը ազգերի ինքնորոշման հարթությունից տեղափոխվում է տարածքային վեճի հարթություն, ինչի պարագայում ստացվում է, որ Հայաստանն ուղղակի զավթել է Ադրբեջանի տարածքները։ Ուշադրության է արժանի նաեւ Սաակաշվիլու մեկ այլ հայտարարություն, որը եւս պաշտոնական արձագանք չի ստացել հայկական կողմից, փոխարենը հայկական պատվիրակության անդամները միայն ելույթի պահին են ակնհայտորեն խառնվել իրար։

Երեկ համացանցում է հայտնվել Սաակաշվիլու ելույթի վրացերեն տարբերակը, որտեղ Վրաստանի նախագահն ասում է, թե «ՀՀ 600 հազար քաղաքացիներ այս տարի այցելել են Վրաստան»։ Սաակաշվիլին նաեւ հավելում է, թե «ՀՀ քաղաքացիների մեծ մասը պարբերաբար է այցելում Վրաստան»։ Այսինքն, Վրաստանի նախագահը ակնարկում է, որ Հայաստանում իրականում շատ քիչ թվով քաղաքացիներ են մնացել, քան հռչակվում է պաշտոնապես։ Սաակաշվիլու ելույթի պահին կադրում երեւում է, թե ինչպես է դահլիճում նստած Սերժ Սարգսյանի աշխատակազմի ղեկավար Վիգեն Սարգսյանը իրար խառնված նայում Էդվարդ Նալբանդյանին, որը եւս իրար խառնված պատասխան հայացք է նետում Վիգեն Սարգսյանին։ Փոխարենը Վրաստանում ՀՀ դեսպան Հովհաննես Մանուկյանը անհոգ տեսքով այդ ողջ ընթացքում հանգիստ լսում է Սաակաշվիլուն։ Վիգեն Սարգսյանի ակնհայտ անհանգստությունը, սակայն, Սերժ Սարգսյանին չի փոխանցվում, եւ նա նորից որեւէ կերպ չի փորձում ուղղել իր վրացի գործընկերոջը»՝ հայտնում է թերթը։