Օլիգարխների «աստեղային ժամը» և Արսեն Թորոսյանի հանդարտությունը

Մի իրավիճակում, երբ ողջ աշխարհը պայքարում է համաճարակի վերածված կորոնավիրուսի դեմ՝ ՀՀ առողջապահության նախարարը հանգստացնում է հանրությանը, սակայն դա անում է անչափ յուրօրինակ կերպով՝ պնդելով, որ վիրուսը ինքնին այդքան էլ վտանգավոր չէ, հետևաբար՝ հավելյալ քայլերի գնալու և հատուկ միջոցառումների կարիք չկա:

Համեմատության համար նշենք, որ նախարարը շատ ավելի անհանգիստ էր, երբ մի ամբողջ համակարգ լծել էր հայտնի Գարդասիլ դեղամիջոցը քարոզելու, մի պարագայում, երբ չկար այսրոպեական, ռեալ վտանգ՝ քաղաքացիների առողջության համար: Փորձագետները տարբեր հարթակներից սարսափազդու պատմություններ էին պատմում, թե ինչ հետևանք կարող է լինել, եթե քաղաքացիները հենց այդ իսկ րոպեին չնետվեն մոտակա պոլիկլինիկա և չստանան համապատասխան պատվաստումը:

Ստացվում է՝ նախարարը անչափ անհանգիստ է և օպերատիվ է, երբ խոսքը վերաբերվում է ստացած գրանտերի համար վարձահատույց լինելուն, մինչդեռ իրական վտանգի առջև երևում է համակարգի ողջ ոչ կոմպետենտությունը: Նախարարությունը, կարծես, չի էլ ցանկանում միջամտել և հասկանալ՝ ի՞նչ խաղեր են խաղում մասնավորները՝ մանիպուլացնելով շուկայում դեֆիցիտ դարձած պաշտպանիչ դիմակների գների հետ: Արդյո՞ք նախարարության նպատակն է օլիգարխների գերշահույթ ապահովելը: Հուսանք՝ ոչ, և մոտական ժամանակներում ականատես կլինենք իրական, գործուն քայլերի՝ այն պարզ պատճառով, որ վտանգը, արդեն իսկ, ՀՀ սահմաններին է, իսկ թեյը, օղին և ժողովրդական բժշկության մյուս միջոցները, ցավոք սրտի, նման մասշտաբի աղետի առջև անկարող են պայքար մղել…