Այսօր Ֆիդել Կաստրոյի ծննդյան օրն է

Կուբայի նախագահ Ֆիդել Ալեխանդրո Կաստրո Ռուզը ծնվել է 1926 թվականի օգոստոսի 13-ին, Կուբայի Օրյենտե նահանգի Բիրան փոքր քաղաքում:  Ֆիդելը դպրոցում լավագույն աշակերտներից մեկն էր' շնորհիվ իր բացառիկ հիշողության: Հենց դպրոցում էլ նրա մոտ ի հայտ են եկել հեղափոխականի հակումները. տասներեք տարեկանում նա մասնակցում է իր հոր շաքարի պլանտացիաների բանվորների ապստամբությանը:

Տասներկու տարեկանում Ֆիդելը նամակ է գրում ԱՄՆ-ի այն ժամանակվա նախագահ Ֆրանկլին Ռուզվելտին: Նամակում նա նախագահին շնորհավորում է վերընտրման առթիվ և խնդրում է. «Եթե Ձեզ համար դժվար չէ, ուղարկեք ինձ, խնդրում եմ, ամերիկյան 10-դոլարանոց թղթադրամ: Ես այն երբեք չեմ տեսել, բայց շատ կուզենայի ունենալ: Ձեր ընկեր Ֆիդել Կաստրո»: 2004 թվականին երիտասարդ Ֆիդելի նամակը Վաշինգտոնում գտել են Ազգային արխիվային ծառայության աշխատակիցները:

1950 թվականին Կաստրոն ավարտել է Հավանայի համալսարանի իրավաբանական ֆակուլտետը, ապա' ասպիրանտուրան: Համալսարանն ավարտելուց հետո Հավանայում զբաղվել է մասնավոր փաստաբանական գործունեությամբ, մասնավորապես, անվճար վարել է աղքատների գործերը: Այդ ժամանակ նա անդամագրվել է Կուբայի ժողովրդի կուսակցությանը:

Ֆիդել Կատրոն ղեկավարել է Կուբական հեղափոխությունը, որը կործանել է Կուբայի դիկտատոր՝ գեներալ Ֆուլխենսիո Բատիստային։ Նույն տարում Կաստրոն դարձել է Կուբայի վարչապետ։ 1965-ին նշանակվել է Կուբայի Կոմունիստական Կուսակցության առաջին քարտուղար և հետևաբար ղեկավարել է Կուբայի փոխակերպությունը դեպի սոցիալիստական հանրապետություն՝ բաղկացած մեկ կուսակցությունից։ 1976 թ. նա նշանակվել է Կուբայի նախագահ և մինչև 2008 թ. փետրվարի 24-ը ղեկավարել այն։

Կաստրոն Կուբայի զինված ուժերի գլխավոր հրամանատարն է և ունի զինված ուժերի ամենաբարձր աստիճանը՝ Comandante en Jefe («գլխավոր հրամանատար»)։