Խուճապից գերշահույթ ապահովողները. ում է հարստացնում կորոնավիրուսը

Հայաստանում երեկ գրանցվեց կորոնավիրուսով վարակման առաջին դեպքը: Մի կողմ դնելով այս հարցի առողջապահական ասպեկտները՝ պետք է նկատել, որ ինչպես և ողջ աշխարհում, այնպես էլ Հայաստանում, պարենային ապրանքների դեֆիցիտն իրեն շատ արագ զգացնել տվեց: Մարդիկ պարզապես մաքրում են խոշոր առևտրային ցանցերի՝ առաջին անհրաժեշտության ապրանքներով տաղավարները: Անկախ նրանից՝ արդարացված է ստեղծված խուճապը, թե՝ ոչ, բիզնեսը միայն շահում է: Այն էլ բիզնեսի մի հստակ սեգմենտ, դա կարելի է հասկանալ մասնավորապես նրանից, թե ինչ են այս օրերին ակտիվորեն գնում ՀՀ քաղաքացիները՝ շաքարավազ, ձեթ, միս, կրուպեղեն, ապրանքներ, որ ներմուծվում են Հայաստան և հաշվի առնելով ստեղծված իրավիճակը, սահմանների ժամանակավոր փակ լինելը, Լարսում կուտակումները՝ վերոնշյալ ապրանքները կարող են դեռ երկար ժամանակ շուկա չմտնել:

Չնայած ՏՄՊՊՀ նախագահը հանգստացնում է հանրությանը՝ պնդելով, որ պարենային ճգնաժամի սպառնալիք չկա: Քաղաքացիների խուճապը զգալիորեն հարստացրեց առանց այդ էլ աղքատությունից չդժգոհող Սամվել Ալեքսանյանի Երևան Սիթիին, ինչպես նաև առևտրային մյուս խոշոր ցանցերի սեփականատերերին: Արդո՞ք ՏՄՊՊՀ-ն պատրաստվում է ստուգումներ անցկացնել այս ցանցերում և պարզել՝ արդյո՞ք գործ չունենք արհեստական դեֆիցիտի հետ, և օլիգարխներն այս անգամ էլ, օգտվելով առիթից, պարզապես չեն ցանկացել մեկ-երկու օրում գերշահույթ ապահովել:

Անգամ, եթե դեֆիցիտը բնական է և պայմանավորված է ընդամենը հանրության մոտ առկա խուճապային և նախաարմագեդոնային գնումներով, պետք է փաստել, որ գերշահույթը, այնուամենայնիվ, ապահովված է. թե՛ վերոնշյալ ապրանքները, թե՛ որոշակի դեղամիջոցներ, որոնք այս օրերին ամենաշատն էին վաճառվում՝ Տերաֆլյու, ախտահանիչ նյութեր, ներկրում են Սամվել Ալեքսանյանին պատկանող ընկերությունները: Ինչպես ասում են՝ Ալեքսանյանի բիզնես բախտը կրկին բերում է…