Փաշինյանը հայ-վրացական գործընկերությունը տարածաշրջանում կայունության կարևոր երաշխիքներից է համարում

Վրաստանի հետ հարաբերությունների հետագա զարգացումը Հայաստանի արտաքին քաղաքականության ամենակարևոր առաջնահերթությունների շարքում է: Վրաստանի վարչապետ Գիորգի Գախարիայի հետ հանդիպումից հետո ԶԼՄ-ների հետ հանդիպմանն այս մասին ասաց ՀՀ վարչապետ Նիկոլ Փաշինյանը: «Առավել քան համոզված եմ, որ դրա համար գոյություն ունեն բոլոր նախադրյալները: Կասկածից վեր է, որ դարերի խորքից եկող բարեկամությունը, որը խարսխված է ընդհանուր արժեքների և պատմական ժառանգության վրա, ամուր հենք և պարարտ հող է ստեղծում մեր համագործակցության համար»,- նշեց Փաշինյանը:

ՀՀ վարչապետն  արձանագրում է, որ այսօր երևան են եկել նոր գործոններ, որոնք անքակտելի են դարձնում հայ-վրացական բարեկամությունը և ավելի ամրապնդում համագործակցության ձգտումը:  «Դա նախևառաջ ժողովրդավարական արժեքների վրա հիմնված ապագա կառուցելու մեր երկու ժողովուրդների ընդհանուր տեսլականն է, որն այլևս անշրջելի է մեզանում և ձեռք է բերել հավատամքի ուժ: Հիրավի, ժողովրդավարության հաղթանակն ու օրենքի գերակայության հաստատումը նոր հորիզոններ է բացել մեր երկու երկրների միջև ամենատարբեր ոլորտներում համագործակցությունն ընդլայնելու համար»,- ասաց ՀՀ վարչապետը:

«Անդրադարձանք տրանսպորտի, էներգետիկայի և այլ ոլորտներում հեռանկարային նախագծերի հետևողական իրագործման անհրաժեշտությանը: Նշվեց երկու երկրների տրանզիտային ներուժի զարգացման կարևորությունը: Խոսքը ոչ միայն ցամաքային ճանապարհների, այլև էլեկտրաէներգետիկ և հեռահաղորդակցային կապի մասին է: Մենք հանդես եկանք համագործակցության մի շարք առաջարկություններով, որոնք վերաբերվում են բարձր տեխնոլոգիաներին, կրթությանը և գիտությանը: Կարևորվեց երիտասարդների միջև կապի ամրապնդումը: Մեր կողմից  առաջարկվեց քայլեր ձեռնարկել երկու երկրների քաղաքացիական  հասարակության կազմակերպությունների միջև կապն ամրապնդելու ուղղությամբ»,- մանրամասնեց Փաշինյանը:

Նա հայտնեց, որ իր վրացի գործընկերոջ հետ անդրադարձել են նաև տարածաշրջանային անվտանգությանն ու խաղաղությանը: «Աներկբա է, որ հայ-վրացական գործընկերությունը մեր տարածաշրջանում կայունության ապահովման կարևորագույն երաշխիքներից է: Անդրադառնալով տարածաշրջանային հիմնախնդիրներին՝ ցանկանում եմ համոզմունք հայտնել, որ դրանց կարգավորման միակ ճանապարհը խաղաղ  բանակցություններն են, որոնց այլընտրանք չկա: Վստահ եմ նաև, որ յուրաքանչյուր հակամարտություն ունի իր առանձնահատկությունները: Այս առումով խիստ կարևորում եմ միմյանց համար զգայուն հարցերի շուրջ հավասարակշիռ դիրքորոշումների պահպանումը»,- ասաց վարչապետ Փաշինյանը:

ՀՀ վարչապետը հավելեց, որ հայ-վրացական ավանդական, եղբայրական հարաբերությունների համատեքստում ցանկանում է ընդգծել վիրահայերի ունեցած նշանակալի ավանդը երկու երկրների հարաբերություններում: «Երախտապարտ ենք վիրահայության ազգային ինքնության, մշակութային և հոգևոր ժառանգության պահպանման ուղղությամբ Վրաստանի իշխանությունների հետևողական քայլերի համար»,- նշեց նա: