Խռացնող երեխաները դեպրեսիայի ու գերակտիվության հակում ունեն

Pediatrics ամսագրում ամերիկացի գիտնականները գրում են, որ երեխաների շրջանում մշտական ու բարձր խռոցը կապված է նախադպրոցական ու կրտսեր դպրոցական տարիքում վարքի հետ ունեցած խնդիրների հետ։ Գիտնականները նշում են, որ այդ վարքագծային խանգարումները արտահայտվում են գերակտիվությամբ, ընկճախտով և անուշադրությամբ։ Գիտնականները հետևել են 249 փոքրիկների ու հարցաքննել նրանց մայրերին քնի բնույթի ու պահվածքի յուրահատկությունների մասին։ Արդյունքում պարզել են, որ շաբաթվա մեջ առնվազն երկու անգամ բարձր խռացնող 2-3 տարեկան փոքրիկները ավելի շատ վարքագծային խնդիրներ են ունեցել, քան այն երեխաները, որոնք ընդհանրապես չեն խռացրել։ Գիտնականների հետազոտության արդյունքում պարզվել է, որ մշտական բարձր խռոցը միջինում հատուկ է յուրաքանչյուր տասներորդ երեխային։ Խռոցը խոսում է երեխայի մոտ շնչառության հետ ունեցած խնդիրների մասին, որը բուժման կարիք ունի։

Հիշեցնենք, որ ավելի վաղ գիտնականները պարզել էին, որ խռացնող մարդիկ քնի մեջ ավելի շատ կալորիաներ են այրում, քան չխռացնողները։