Եվգենի Պլյուշենկոն հեռանում է քաղաքականությունից

Գեղասահքի աշխարհի բազմակի չեմպիոն, ռուս հայտնի գեղասահորդ Եվգենի Պլյուշենկոն այսօր ռուսական լրատվամիջոցներին հայտնել է, որ ինքը դիմում է գրել՝ ՌԴ Դաշնային խորհրդի նախկին նախագահ Սերգեյ Միրոնովի ղեկավարած «Արդար Ռուսաստան» կուսակցությունից դուրս գալու և քաղաքականությունից հեռանալու իր մտադրությունների մասին։

Նա իր այդ քայլը հիմնավորել է մեծ սպորտ վերադառնալու և 2014 թվականի Սոչիի օլիմպիադային հաջող մասնակցելու ցանկություններով։ Վերջինս իր շնորհակալությունն է հայտնել Սերգեյ Միրոնովին և կուսակցության փոխնախագահ Օլեգ Նիլովին համատեղ աշխատանքի համար և ավելացրել, որ իր այդ քայլը ոչ մի քաղաքական դրդապատճառներ չունի։  

Եվգենի Պլյուշենկոն «Արդար Ռուսաստան»–ին էր անդամագրվել 2006 թ.–ի վերջին և 2007 թ.–ին այդ կուսակցությունից ընտրվել Սանկտ Պետերբուրգի օրենսդիր ժողովի պատգամավոր։

Հաղորդում է «Комсомолская Правда»–ն։