Փոխվարչապետն այցելեց Վայոց ձորի մարզ

ՀՀ փոխվարչապետ, տարածքային կառավարման նախարար Արմեն Գևորգյանը շարունակում է մարզային այցելությունները` առաջնահերթ խնդիրների լուծման ծրագրի ընթացքին ծանոթանալու և հրատապ այլ խնդիրների քննարկման նպատակով:

Ա. Գևորգյանն այսօր մեկնեց Վայոց ձոր` այցն սկսելով Շատին համայնքից, որտեղ, մարզպետ Սերգեյ Բագրատյանի ուղեկցությամբ, ծանոթացավ փլուզված ճանապարհի վերականգնման աշխատանքներին: Ճանապարհը սողանքի հետևանքով փլուզվել էր ամռան սկզբին, այն վերականգվել է պետբյուջեից հատկացված 118 մլն դրամով: Փոխվարչապետին զեկուցվեց, որ գրունտային ճանապարհն ապահովում է բնականոն երթևեկությունը, և հաջորդ տարի անհրաժեշտ կլինի ասֆալտապատում իրականացնել:

Մարզի ընթացիկ խնդիրներին վերաբերող հարցեր քննարկվեցին մարզպետարանում՝ Տարածքային կառավարման նախարարության, մարզպետարանի պատասխանատուների մասնակցությամբ կայացած խորհրդակցության ընթացքում: Փոխվարչապետին զեկուցվեց մարզի առաջնահերթ խնդիրների լուծման ծրագրի՝ առաջին մասի ավարտի և երկրորդ մասի ընթացքի մասին: Տեղեկացվեց, որ, ծրագրի առաջին մասով, հատկացված 260 մլն դրամի շրջանակում նախատեսված աշխատանքներն ավարտվել են: Միջոցները հիմնականում ուղղվել են մարզի քաղաքային համայնքների բնակելի շենքերի տանիքների վերանորոգմանը:

Ծրագրի երկրորդ մասով՝ արդեն ավարտվել են Եղեգնաձոր քաղաքի Գևորգյան փողոցի վերանորոգման աշխատանքները, ընթացքի մեջ են Եղեգնաձորի Շահումյան 15 հասցեում գտնվող բազմաբնակարան շենքի հիմնանորոգման և ամրացման աշխատանքները, որի համար 45 մլն դրամ հատկացվել էր առաջին, 33 մլն դրամ` երկրորդ ծրագրով: Ծրագրի երկրորդ մասով՝ մի շարք համայնքներում կհիմնանորոգվի խմելու ջրի ցանցը, Ռինդ համայնքում կկառուցվի կոյուղագիծ, կնորոգվեն բազմաբնակարան շենքերի տանիքներ: Փոխվարչապետը մարզպետին հանձնարարեց ուշադրության կենտրոնում պահել աշխատանքների ընթացքը՝ կարևորելով աշխատանքների ժամանակին և որակով իրականացումը:

Խորհրդակցությանը ներկայացվեցին նաև մարզի համայնքային բյուջեների՝ 2011 թ.-ի տասնմեկ ամիսների կատարողականի ցուցանիշները: Դեկտեմբերի 1-ի դրությամբ՝ Վայոց ձորի մարզի համայնքների բյուջեների փաստացի մուտքերը, նախատեսված 936 մլն դրամի դիմաց, կազմել են 913,1 մլն դրամ (կատարողականը`97,69 %):

Սեփական եկամուտների կատարողականը կազմել է 95.2 %, հավաքագրման մակարդակը, 2010 թ.-ի նույն ժամանակահատվածի համեմատ, նվազել է 0,5 %-ով: Հողի հարկի կատարողականը կազմել է 102,1%, ինչը, սակայն, 2010 թ.-ի նույն ժամանակահատվածի համեմատ, նվազել է 9 %-ով: Գույքահարկի կատարողականը կազմել է 104,5 %, նախորդ տարվա համեմատ՝ արձանագրվել է 1,2 %-ի աճ:

Նշվեց, որ չնայած այն հանգամանքին, որ հողի հարկի հավաքագրման կատարողականը բարձր է, սակայն, նախորդ տարվա համեմատ, հավաքագրման ցուցանիշը նվազել է հիմնականում Վերնաշեն, Աղավնաձոր, Կարմրաշեն, Զառիթափ, Ազատեկ, Հերհեր համայնքներում:

Փոխվարչապետը ընդհանուր առմամբ դրական գնահատելով հավաքագրումների մակարդակը` միաժամանակ մարզպետին հանձնարարեց մինչեւ տարեվերջ աշխատանքնե րիրականացնել հատկապեսհողի հարկիցուցանիշների բարելավման ուղղությամբ:

Փոխվարչապետին զեկուցվեց նաև մարզում գյուղատնտեսական իրավիճակի մասին: Տեղեկացվեց, որ մարզում կատարվել է 1.100 հա աշնանացան` 55 հեկտարով ավելի, քան նախորդ տարի: Նախորդ տարվա համեմատ՝ բարձր է եղել նաև բերքատվության ցուցանիշը. արտադրվել է 5.845տ հացահատիկ և ընդեղեն` նախորդ տարվա 4.151 տոննայի դիմաց, 4.100 տոննա խաղող` 3.809 տոննայի դիմաց:

Տեղեկություններ ներկայացվեցին՝ համայնքների գլխավոր հատակագծերի կազմման, մարզում ինտեգրված սոցիալական ծառայությունների ներդրման և միասնական ընդունարանների տեղակայման համար՝ անհրաժեշտ շենքային պայմանների հատկացման, անապահովության գնահատման համակարգում ընդգրկվելու նպատակով ընտանիքների փաստագրման գործընթացների մասին: Անդրադարձ եղավ նաև մարզի համայնքներում զորակոչիկների հաշվառման ընդհանուր իրավիճակին, զորահավաքային նախապատրաստության հետ կապված հարցերին:

Փոխվարչապետն առանձին խորհրդակցություն անցկացրեց՝ Արդարադատության նախարարության իրավաբանական անձանց պետական ռեգիստրի գործակալության, ԿԱ անշարժ գույքի կադաստրի պետական կոմիտեի տարածքային ստորաբաժանումների, Ճանապարհային ոստիկանության հաշվառման քննական բաժինների ղեկավարների մասնակցությամբ` կարևորելով վերջին շրջանում իրավական ակտերում կատարված փոփոխությունների պահանջների կատարումը: