«Չորրորդ ինքնիշխանություն». Ներիր ինձ, հայրի՛կ

««Jose» ռեստորանային համալիրի սեփականատերը, Արարատյան թեմի առաջնորդ Նավասարդ Կճոյանի սանիկը՝ Մհեր Ավետիսյանը, երեկ արձագանքել էր «ՉԻ» նախորդ օրվա հրապարակմանը, որը մենք մեր ընթերցողներին ներկայացրել էինք առանց էական կրճատումների:

Երեկ արդեն Մհեր Ավետիսյանը պարզաբանել է իր «ՉԻ» պարզաբանումը, այս անգամ արդեն ոչ թե «ՉԻ»-ի, այլ տարբեր էլեկտրոնային կայքերի շրջանակներում:
Հիշեցնենք, որ «ՉԻ»-ին տված պարզաբանման մեջ նա ասել էր, որ ինքը որեւէ մեկին չի «քցել», երկրորդ՝ Կճոյան սրբազանին չի նվիրել «Բենթլի» մեքենա: «Չեմ նվիրել, չեմ էլ պատրաստվում որեւիցե մեկին նվիրել մեքենա կամ 1000 ԱՄՆ դոլարանոց ինչ-որ մի բան, դա կլինի սրբազան Կճոյանը, թե դա կլինի... ով ուզում է լինի՝ սենց ասեմ»,- հայտարարել էր «Jose»-ի սեփականատերը: «Կճոյանը ձեր քավո՞րն է, թե՞ ոչ» հարցին նա պատասխանել էր. «Ոչ: Կճոյանը իմ երեխայի քավորն է, բայց դա չի նշանակում, որ ես իրեն պարտավոր եմ կամ ցանկություն ունեմ մեքենա նվիրելու»: «Վարչապետի նման հովանավոր ունենալ ցանկացած մեկը կցանկանար, գուցե նաեւ երազեին: Բայց դուք ինչո՞ւ եք այդպես արհամարհական տոնայնությամբ խոսում այդ մարդու մասին»,- նկատել էինք մենք: Ի պատասխան Մհեր Ավետիսյանն ասել էր. «Եթե մի բան չկա, ես վիրավորվում եմ դրանից: Ես չեմ երազում ու ընդհանրապես հովանավոր չունեմ»:

Երեկ արդեն «Մեր գերդաստանը պաշտում է Նավասարդ Սրբազանին» վերնագրով պարզաբանման մեջ Մհեր Ավետիսյանը պարզաբանել է. «Հայցում եմ բոլորի ներողամտությունը մտքերս ոչ կոռեկտ ձեւակերպելու համար. վերջինիս պատճառն անհիմն եւ սուտ հրապարակումներն էին թե իմ, թե մեր ընտանիքում սրբություն համարվող Նավասարդ Սրբազանի նկատմամբ: Մեր ողջ գերդաստանը սիրում եւ պաշտում է Նավասարդ Սրբազանին. հայցում եմ նրա ներողամտությունը: Եվս մեկ անգամ ուզում եմ ընդգծել եւ ասել հետեւյալը՝ Հոգեւոր, բարոյական հարաբերություններն ավելի բարձր հարթության վրա են գտնվում եւ մի փորձեք դրանք նսեմացնել»,- օրինակ՝ «Lragir.am»-ի թղթակցի հետ զրույցում հայտարարել է «Jose» ժամանցի կենտրոնի սեփականատեր Մհեր Ավետիսյանը: Կայքը հատուկ ընդգծում է, որ Մհեր Ավետիսյանը Նավասարդ Կճոյանի սանիկն է: Մինչդեռ Ավետիսյանը մեզ հետ զրույցում հրաժարվել էր Կճոյանի սանիկի կարգավիճակից՝ նշելով, որ Կճոյանը ոչ թե իր, այլ իր որդու քավորն է, որի քավորությունը ստանձնելուց Կճոյանը նվիրել է հինգ գրամանոց ոսկյա խաչ՝ սովորական թելով: Սա իմիջայլոց:

Կայքի լրագրողի հարցին՝ «Ի՞նչը Ձեզ դրդեց այդ աստիճան դուրս գալ հունից, ի՞նչ վատ բան կա նվեր տալու կամ հովանավորվելու մեջ», Մհեր Ավետիսյանը պատասխանել է. «Ես ամենեւին դեմ չեմ, երբ խոսքը բարյացակամ հովանավորության եւ նվերների մասին է: Ես զայրույթով եմ լցված, որովհետեւ մեր հոգեւոր բարձր հարաբերությունները թերթի հրապարակման մեջ վերածել իրականում գոյություն չունեցող ԱՌ եւ ՏՈՒՐԻ, հովանավորի եւ հովանավորվողի, պարզապես անթույլատրելի է»:

Մեկնաբանություններն այստեղ առավել քան երբեւէ ավելորդ են»՝ հայտնում է «ՉԻ»-ն: