Զգոնությունը կորցրած, փորձություններով չանցած ժողովուրդները մեծ ապագա չունեն. Սեյրան Օհանյան

Օգոստոսի 14-ին «Բազե» համահայկական երիտասարդական հավաքի մասնակիցների հետ հանդիպեց ՀՀ պաշտպանության նախարար Սեյրան Օհանյանը։

Հայաստանի երիտասարդական հիմնադրամի հասարակայնության հետ կապերի ծառայությունից հայտնում են, որ նախարարը, ողջունելով բազեականներին, նշեց, որ իր համար մեծ պատիվ է ամեն տարի մասնակցել արդեն ավանդական դարձած «Բազե» հավաքին, եւ նա դա համարեց օրինաչափ, քանի որ պաշտպանության նախարարը ղեկավարում է Հայաստանի ամենամեծ երիտասարդական կազմակերպությունը՝ հայոց բանակը։ Սեյրան Օհանյանը կարեւորեց բոլոր այն երիտասարդական միջոցառումները, որոնք ուղղված են մեր երկրի ապագային, հայ ժողովրդի, երիտասարդ սերնդի ռազմահայրենասիրական դաստիարակությանը։

ՀՀ պաշտպանության նախարարի կարծիքով՝ ժողովուրդների պատմությունը կերտվում է ուժով եւ գիտելիքներով, արվեստով, մշակույթով, քաղաքակրթությամբ: «Եթե ուժով հաստատագրում ես քո ներկայությունը, ստեղծում ես պայմաններ, որպեսզի քեզ վրա որեւիցե ռազմական ոտնձգություն չլինի, ապա արվեստի միջոցով քաղաքակիրթ կերպով ստեղծում ես պայմաններ, որպեսզի քեզնից մեկընդմիշտ հեռու մնան: Գիտեք՝ մեր բախտը հարեւանների հարցում «բերել է», այդ իսկ պատճառով մենք միշտ պետք է զգոն լինենք: Եվ խոսելով մեր տարածաշրջանի ռազմաքաղաքական իրավիճակի մասին՝ ես միշտ ասում եմ՝ Աստված մեզ մեր ուժերի չափով այնքան փորձություն տա, որպեսզի մենք մեր զգոնությունը երբեւիցե չկորցնենք։ Զգոնությունը կորցրած, փորձություններով չանցած ժողովուրդները մեծ ապագա չունեն»,- նշեց նախարարը:

ՀՀ պաշտպանության նախարարը պատասխանեց նաեւ բազեականների հարցերին։ Դրանք վերաբերում էին ռազմահայրենասիրական դաստիարակությանը, պաշտպանական քաղաքականությանը, ռազմական կրթությանը եւ այլ թեմաների։ Անդրադառնալով ղարաբաղյան հարցի կարգավորմանը՝ Սեյրան Օհանյանը շեշտեց, որ արցախյան խնդրի խաղաղ լուծումն այլընտրանք չունի. ռազմական ճանապարհով ղարաբաղյան հարցը մեկ անգամ արդեն լուծվել է, այժմ դիվանագիտական քայլեր պետք է արվեն՝ այդ ամենն ամրագրելու համար։

Սեյրան Օհանյանը շրջայց կատարեց ճամբարում եւ ծանոթացավ բազեականների առօրյային: