«Հայկական Ժամանակ». Գյումրիում առաջադրվելու է «Սովրանո»-ի նախագահ Արման Սահակյանը.

Ըստ իշխանական աղբյուրների՝ Գյումրին ընդգրկող թիվ 35 ընտրատարածքում, որտեղից պատգամավոր էր դարձել ԲՀԿ-ական Սամվել Բալասանյանը, առաջադրվելու է «Սովրանո» ընկերության նախագահ, ՀՀԿ-ական Արման Սահակյանը։

Մենք տեղեկացրել էինք, որ մայիսի 6-ին տեղի ունեցած Աժ ընտրություններից հետո Գյումրիում ընտրությունների արդյունքներից խիստ դժգոհ ՀՀԿ-ն որոշել էր գործող ՀՀԿ-ական քաղաքապետ Վարդան Ղուկասյանի փոխարեն առաջադրել Արման Սահակյանի թեկնածությունը: Սակայն, պարզվել է, որ Սահակյանը Գյումրիում հաշվառված չէ, այնինչ ԸՕ-ով քաղաքապետի պաշտոնոմ կարող է առաջադրվել տվյալ քաղաքում վերջին վեց ամսում հաշվառված անձը (Աժ ընտրություններում օրենքի նման խոչընդոտ չկա):

Հետևաբար, իշխանությունը որոշեց Գյումրիի քաղաքապետի պաշտոնում առաջադրել և սատարել ԲՀԿ-ական Սամվել Բալասանյանին, որը մայիսի 6-ին պատգամավոր էր դարձել թիվ 35 ԸՏ-ից, իսկ նրա այդ ընտրատարածքը հանձնել ՀՀԿ-ական Արման Սահակյանին: Վերջինս, հիշեցնենք, մայիսի 6-ին առաջադրվել էր Շիրակի մարզի մեկ այլ ԸՏ-ում թիվ, 34-ում, որտեղից պատգամավոր դարձավ ԲՀԿ–ական Մարտուն Գրիգորյանը: Թերթը նշում է, որ թիվ 35-ում ընտրությունները կայանալու են դեկտեմբերի վերջին կամ հունվարի սկզբին: