Չնայած պարետի որոշմանը՝ Վիեննա-Երևան-Վիեննա առաջին չվերթը կկայանա

Վիեննա-Երևան-Վիեննա առաջին չվերթը վաղը՝ մարտի 20-ին, կկայանա: Այս մասին ԼՈՒՐԵՐ.com-ի հարցին ի պատասխան՝ ասաց «Wizz Air» ընկերության կորպորատիվ համագործակցության ղեկավար Անդրաս Ռադոն: 

«Մենք կիրականացնենք Երևան-Վիեննա չվերթը՝ ինչպես նախատեսված է, մինչև կլինի հետագա ծանուցումը»,- նշեց նա:

Վիեննայի «Վիեննա-Շվեխատ» օդանավակայանից չվերթը կմեկնարկի Վիեննայի ժամանակով  ժամը 13:55-ին և Երևան կժամանի Երևանի ժամանակով  20:25-ին:

Նշենք, որ նոր կորոնավիրուսով պայմանավորված՝ պարետի 2020 թ. մարտի 17-ի N 1 որոշմամբ՝ որոշ չվերթներ չեղակվել կամ հետաձգվել են: Չնայած նրան, որ համաճարակաբանական լարված իրավիճակ ունեցող երկրների ցանկում ընդգրկված է նաև Ավստրիան, սակայն «Wizzair» ավիաընկերությունը պատրաստվում է իրականացնել թռիչքը դեպի Վիեննա։

Նկատենք, որ մինչ այս, թռիչքները չեղարկելու կամ հետաձգելու վերաբերյալ Քաղաքացիական ավիացիայի հրապարակած ցանկում այս ավիաընկերության մասին որևէ ինֆորմացիա չկար, ինչը տարակուսանքի առիթ էր ստեղծել այն մարդկանց մոտ, որոնք պետք է մեկնեն այս չվերթով։ 

Հիշեցնենք, որ 2019թ. դեկտեմբերի վերջին տեղի ունեցած մամուլի ասուլիսի ժամանակ «Wizz Air» ընկերության կորպորատիվ համագործակցության ղեկավար Անդրաս Ռադոն հայտարարել էր, որ «Wizz Air» բյուջետային ավիաընկերությունը 2020 թ. ապրիլից Երևանից չվերթներ կիրականացնի դեպի Վիեննա, իսկ տոմսերի արժեքները կլինեն շատ ցածր՝ սկսած 24.99 եվրոյից: