Քանաքեռ-Զեյթուն վարչական շրջանում 350 շահառուներ օգտվում են «Գթության խոհանոցից»

Երևանի քաղաքապետ Տարոն Մարգարյանը հանդիպել է գերմանական Կարմիր խաչի արտաքին կապերի տնօրեն Միխայիլ Վիբելին։ Հանդիպման ընթացքում բարձր գնահատելով երկու տասնամյակը բոլորած բարենպաստ համագործակցության արդյունավետությունը՝ կողմերը երկուստեք վերահաստատել են գործակցությունն առավել սերտ ու նպատակային դարձնելու պատրաստակամությունը:

Տարոն Մարգարյանն ընդգծել է, որ Երևանի քաղաքապետարանը պատրաստ է արագ արձագանքել գերմանական Կարմիր խաչի երևանյան գրասենյակի բարեգործական առաքելության շրջանակում առաջացող խնդիրներին, որոնց լուծումը գտնվում է մունիցիպալ իշխանության լիազորությունների տիրույթում: Որպես ասվածի վառ օրինակ` քաղաքապետը բերել է Երևանի ավագանու որոշմամբ գերմանական Կարմիր խաչի երևանյան գրասենյակին գույքահարկի արտոնություն տրամադրելու փաստը:

Միխայիլ Վիբելն իր հերթին շնորհակալություն է հայտնել քաղաքապետին համագործակցության շարունակման պատրաստակամության համար և որպես արդյունավետ փոխգործակցության օրինակ` հատկանշել է կազմակերպության և Քանաքեռ-Զեյթուն վարչական շրջանի միջև ձևավորված երկարամյա համագործակցությունը: Միայն այս վարչական շրջանում 350 շահառուներ օգտվում են «Գթության խոհանոցից»:

Միխայիլ Վիբելը հիշատակել է նաև քահանա Կառլ-Հայնց Շայդեին, ով ևս իր ջերմագին ողջույններն ու բարեմաղթանքներն է փոխանցել Տարոն Մարգարյանին՝ Երևանի քաղաքապետի պաշտոնում ընտրվելու կապակցությամբ: Միխայիլ Վիբելը նաև տեղեկացրել է, որ Հայաստանին ուղղված մարդասիրական ծրագրերի համար Կառլ-Հայնց Շայդեն այս տարի պարգևատրվելու է Գերմանիայի Դաշնային Հանրապետության նախագահի բարձրագույն շքանշանով: