Տարոն Մարգարյանը հանդիպել է Մանկական Եվրատեսիլ երգի մրցույթի պատվիրակության անդամների հետ

Երևանի քաղաքապետ Տարոն Մարգարյանը հանդիպել է դեկտեմբերի 3-ին մայրաքաղաքում անցկացվող 9-րդ Մանկական Եվրատեսիլ երգի մրցույթի պատվիրակության անդամների հետ:

Ողջունելով մասնակիցներին՝ Երևանի քաղաքապետը կարևորել է հանրաճանաչ միջազգային մրցույթն Երևանում անցկացնելու փաստն ու ընդգծել, որ պատմամշակութային հազարամյա հարուստ ավանդույթներ ունեցող մեր մայրաքաղաքն այսօր ապրում է ակտիվ մշակութային կյանքով։

Տարոն Մարգարյանը նաև նշել է, որ քաղաքապետարանը, մեծ տեղ հատկացնելով մշակութային համատեղ ծրագրերի իրականացմանը, ակնկալում է եվրոպական մասնակից պետությունների տարբեր քաղաքների հետ գործընկերային հարաբերությունների ձևավորում և ընդլայնում: «Համոզված եմ, որ մրցութային ծրագիրը, որն ամեն տարի հիացնում է տարբեր երկրների քաղաքացիների, այս տարի ևս հաճույք և հիացմունք կպատճառի ամբողջ աշխարհին: Հաջողություններ եմ մաղթում մեր բոլոր տաղանդավոր փոքրիկներին և հուսով եմ, որ Երևանի ջերմությունը կտանեք ձեզ հետ ու անպայման կցանկանաք կրկին այցելել մեր քաղաք», - նշել է քաղաքապետ Տարոն Մարգարյանը:

Մանկական Եվրատեսիլ երգի մրցույթում Հայաստանի պատվիրակության ղեկավար Գոհար Գասպարյանը Մանկական Եվրատեսիլին մասնակից պատվիրակությունների անդամների անունից շնորհակալություն է հայտնել քաղաքապետին՝ հանդիպման, ջերմ բարեմաղթանքների և աջակցության համար: «Հյուրերը ոգևորված և տպավորված են մեր հին, բայց և երիտասարդ քաղաքի գեղեցկությամբ ու հյուրընկալությամբ: Շատերն այնքան են սիրել մեր քաղաքը, որ վերադառնալու ցանկություն են հայտնել», - նշել է Գոհար Գասպարյանը:

Հանդիպմանը ներկա էր նաև նախորդ տարի Մանկական Եվրատեսիլ երգի մրցույթում մեր երկրին հաղթանակ բերած Վլադիմիր Արզումանյանը: Շնորհակալություն հայտնելով փոքրիկին մեր երկրի պատիվը բարձր պահելու համար՝ քաղաքապետ Տարոն Մարգարյանը մաղթել է նրան նորանոր հաղթանակներ ու նվաճումներ և հանձնել մայրաքաղաքի զինանշան-խորհրդանիշը:

Հանդիպման ավարտին պատվիրակության անդամներն Երևանի քաղաքապետին են փոխանցել ազգային հուշանվերներ և, ի հիշատակ հանդիպման, լուսանկարվել են քաղաքապետի հետ: