Առողջապահության նախարարը մեկնել է Արարատի մարզ

ՀՀ առողջապահության նախարար Դերենիկ Դումանյանն այսօր Արարատի մարզ կատարած աշխատանքային այցի ընթացքում մարզպետ Էդիկ Բարսեղյանի ուղեկցությամբ նախ ծանոթացել է Արարատի բժշկական կենտրոնում իրականացվող բուժծառայությունների կազմակերպմանը։ Կենտրոնը 2010 թվականին հիմնանորոգվել և բուժսարքավորումներով հագեցվել է Համաշխարհային բանկի վարկային ծրագրով, ապահովված է անհրաժեշտ սարքավորումներով և մասնագետներով։ Անցած երկու տարվա ընթացքում 2 վիրահատարանները, ծննդատունն ու բաժանմունքները մնացել են գերազանց վիճակում։ Արդյունավետ կառավարման շնորհիվ կենտրոնում առկա պայմաններն արդյունավետորեն ծառայեցվում են ազգաբնակչությանը պատշաճ բուժօգնություն ապահովելու գործին։

Նախարար Դումանյանը նշել է, որ կատարված ուսումնասիրությունների արդյունքներով բժշկական այս կենտրոնը Համաշխարհային բանկի ծրագրով հիմնանորոգված մարզային հիվանդանոցներից ամենաարդյունավետ գործող հիմնարկներից մեկն է։

«Մարզային նման հագեցվածություն և մասնագետներ ունեցող ծննդատներին մենք հնարավորություն կտանք բարձրացնելու իրենց կարգը, որպեսզի ավելի բարդ միջամտություներ ևս կատարեն և ծնունդները բացառիկ դեպքերում ուղեգրեն Երևան»,- ասել է Դերենիկ Դումանյանը։

Այնուհետև նախարարը ծանոթացել է Վեդու ծննդատանը և բժշկական կենտրոնում մատուցվող ծառայությունների կազմակերպմանը։ Ծննդատանն առկա էր ծնունդների արտահոսքի, իսկ բժշկական կենտրոնում՝ ունեցած շենքերի օպտիմալացման խնդիրը։

Իրավիճակն այս առումով առավել մտահոգիչ էր Արտաշատի բժշկական կենտրոնում, ուր ծավալված է 155 մահճակալ։ Թեև 2008-ին կենտրոնը վերանորոգվել է պետական բյուջեի միջոցներով, սակայն այսօր արդեն այն ոչ բարվոք վիճակում է։

Մասիսի բժշկական կենտրոնում նախարար Դումանյանին տեղեկացրել են, որ ծննդօգնության պետական հավաստագրերի ներդրումից հետո հաշվառված հղիների կեսը մայրաքաղաքի ծննդատներում է ծննդաբերում։ Ծննդկանների համար հրապուրիչ պայմաններ ստեղծելու նպատակով այստեղ մարզպետարանի աջակցությամբ նոր պայմաններ են ստեղծում։

Դերենիկ Դումանյանը տեղեկացրել է, որ նման փաստերը հիմք են տալիս բարձրացնելու ծննդօգնության պետական հավաստագրերի մարզային կտրվածքով տեղայնացնելու խնդիրը։

Այցի ավարտին նախարար Դումանյանը մարզպետի հետ քննարկել է մարզային հիվանդանոցների արդյունավետ կառավարման, ընտանեկան բժշկի ինստիտուտի ներդրման և առկա այլ խնդիրների լուծման ուղիները։