Արտոնյալ ժամանակահատվածով վարկեր` գյուղատնտեսներին. ներկայացվել են մանրամասներ

Կառավարության մամուլի կենտրոնում տեղի ունեցավ ՀՀ էկոնոմիկայի նախարարի տեղակալներ Արման Խոջոյանի և Տիգրան Գաբրիելյանի մամուլի ասուլիսը։ Նրանք անդրադարձան կորոնավիրուսի տնտեսական հետևանքների չեզոքացմանն  ուղղված գյուղատնտեսության ոլորտի միջոցառմանը, ինչպես նաև աջակցության ընթացիկ ծրագրերին, որոնք արժանացել են կառավարության հավանությանը:

Խոջոյանն ասաց, որ ճգնաժամային պայմաններում շատ ավելի կարևոր է դարձել գյուղատնտեսական ոլորտը, ինչպես մեր երկրում, այնպես էլ ամբողջ աշխարհում.«Փորձել ենք ոլորտի աջակցության ծրագրում ներառել ամբողջ շղթան՝ սկսած ֆերմերներից, մինչև վերամշակողներ և արտահանողներ»:

Խոջոյանն, անդրադառնալով միկրովարկերին, այսինքն՝ զրոյից մինչև մեկ միլիոն վարկերը մարդիկ կարող են վերցնել զրո տոկոս տոկոսադրույքով. «Եթե բանկը համարի, որ ֆերմերը կարող է օգտվել նման վարկատեսակից, ապա սահմանվում է մինչև ինը ամիս արտոնյալ ժամկետ և ֆերմերը կարող է գումարը վերցնել, ներդնել իր տնտեսությունում, իրականացնել հողի մշակման աշխատանքները և ինը ամիս հետո, երբ նա բերքը վաճառած կլինի և գումար կունենա, կկարողանա մարել վարկը»:

Վարկի մյուս տեսակը, 3-15 միլիոն դրամ արժողությամբն է, որը տրամադրվում է 5 տարի ժամկետով է, արտոնյալ ժամանակահատվածը 12 ամիս է: Նախատեսվում է, որ այս վարկատեսակից կօգտվեն ավելի մեծ տնտեսություն ունեցող ֆերմերները:

«Ինտենսիվ այգիների հիմնում, ջերմոցների ստեղծում, հակակարկտային, ջրամատակարարման համակարգերի համար նախատեսված վարկեր ևս կան: Բոլոր ծրագրերը ունեն արտոնյալ ժամանակահատվածներ: Հումքը վերամշակողների համար ևս կան արտոնություններ՝ որոշ դեպքերում երկարացվում են վարկի մարման ժամկետները»,- ասաց նա:

Բանախոսը նշեց, որ ծրագրերի կիրառման ժամանակ, եթե առաջանան խնդիրներ, տարընթերցումներ, ապա իրենք մշտապես պատրաստ են աշխատել ծրագրերի որակը ավելի բարձրացնելու համար:

Գյուղացիներն ու ֆերմերները բոլոր վարկային ծրագրերին, մասնակցության կարգին և քայլերի հաջորդականությանը կարող են ծանոթանալ էկոնոմիկայի նախարության պաշտոնական էջում: