Ավելի քան 30 մարդ է զոհվել սիրիական Ազազ քաղաքի վրա օդային հարձակման արդյունքում

Չորեքշաբթի օրը՝ oգոստոսի 15-ին, սիրիական ավիացիայի՝ ապստամբների կողմից վերահսկվող Ազազ քաղաքի վրա հարձակման արդյունքում, ըստ թարմեցված տվյալների, 31 մարդ է զոհվել, ավելի քան 200 մարդ վիրավորվել է, հաղորդում է Al-Arabya-ն։ Զոհվածների թվում  կան կանայք և երեխաներ։

Օդային հարվածի արդյունքում, որը, ըստ սիրիական իրավապաշտպանների, հասցվել է «ՄիԳ»-ով, ամբողջությամբ ավերվել է մի քանի տուն։ Հաղորդվում է նաև, որ փլված շենքերի տակ կան տուժածներ։ Agence France-Presse թղթակիցը իր հերթին հայտարարել է, որ ավերվել է առնվազն 10 տուն:

Ավելի վաղ լրատվամիջոցները հաղորդում էին, որ այս հարվածի արդյունքում զոհվել է չորս մարդ տասնմեկ լիբանանյան պատանդներից, ովքեր երեք ամիս պահվում էին Սիրիայում։

Նշենք, որ Ազազ քաղաքը գտնվում է Հալեպից ոչ հեռու, որը վերջին շրջանում հանդիսանում է Ասադի զորքի և ապստամբների հակամարտության հիմնական գոտին։

Հիշեցնենք, որ Սիրիայի նախագահ Բաշար ալ-Ասադի զորքերի և զինված ընդդիմադիրների միջև պայքարը շարունակվում է Սիրիայում 2011 թվականի մարտից։ Այս ընթացքում երկրում սպանվել է տասնյակ հազարավոր մարդ, հարյուր հազարավոր մարդ դարձել է փախստական։