Նպատակը Արցախի հանրապետությանը վարկաբեկելն է. ԼՂՀ նախագահի խոսնակ

Երեկ Lurer.com-ը հրապարակեց մի հոդված, որում ԼՂՀ պետական համալսարանի նախկին դասախոս, ԼՂՀ նախագահի  թեկնածու Վիտալի Բալասանյանի շտաբի անդամ Հայկ Խանումյանը արցախյան իշխանություններին մեղադրում էր քաղաքական հայացքների համար իր դեմ քրեական հետապնդում սանձազերծելու մեջ:,-գրել էր Խանումյանը:

Այս առիթով մեզ հետ ունեցած զրույցում ԼՂՀ նախագահի մամուլի խոսնակ Դավիթ Բաբայանը փոխանցեց հետևյալը:

-Ծանոթ ե՞ք այդ հայտարարությանը։

-Այո, և գիտեմ՝ ինչն է պատճառը։
Մեզ մոտ  ակտիվ ներքաղաքական գործընթացներ էին, որոնց ներգրավված էին նաև մարդիկ, ովքեր չունեն հավասարակշռված հոգեբանական կեցվածք։ Նրանցից մեկն այդ անձնավորությունն է՝ Խանումյանը։

-Ի՞նչ նկատի ունեք անհավասարակշիռ կեցվածք ասելով:

-Այդ մարդն ունի հիվանդագին ամբիցիաներ, խանգարված մտածելակերպ։ Ի դեպ, ժամանակին նրա աշխատանքի հարցում ես եմ օգնել, որ համալսարանում դասախոսի։ Նա չկարողացավ նորմալ դասավանդել, ուսանողները պարբերաբար նրան հեռացնում էին լսարանից, նա բարոյականության հետ խնդիր ունի, այնպիսի բաներ էր քարոզում, որ արցախահայության էությանը խորթ էին։ Անգամ եղել են դեպքեր, երբ այնքան է չափերն անցել, որ ապտակել են։

Ի վերջո նրան հեռացրին համալսարանից։ Այդ մարդը մտել է Վիտալի Բալասանյանի նախընտրական շտաբ։ Ոչ մի վատ բան չկա այս կամ այն թեկնածուին աջակցելու մեջ։

Ի՞նչ է տեղի ունեցել։
Այդ մարդը շարունակել է իր անհավասարակշիռ վարքագիծը։ Եվ վերջերս , եթե չեմ սխալվում՝ հուլիսին, ընկերուհու հետ մտել է համալսարան և սկսել իրենց անվայելուչ պահել, անգամ՝ վուլգար. համբուրվել են կրթական օջախի մեջտեղում և այլն, և այլն։ Այդ ժամանակ համալսարանի տեխնիկական գծով տեղակալը մոտեցել և խնդրել է, որ հեռանան տարածքից՝ հայտնելով, որ համալսարանում մարդ չկա և եթե գործ ունեն՝ մի քանի օրից գան։

Խանումյանը սկսել է ծեծել 65 տարեկան այդ մարդուն, հասկանում ե՞ք։ Կողքը կանգնած են եղել երկու բանվոր, նրանք կանխել են հետագա հարվածների հասցնումը, թույլ չեն տվել ավելի շատ վնասվածք պատճառել տարեց մարդուն։ Բնական է, որ դա խուլիգանություն է և քրեական պատասխանատվություն պետք է լինի նման արարքի համար։ Խանումյանը հիմա փորձում է դա շահարկել, թե իրեն քաղաքական դրդապատճառներով հետապնդում են։

Խանումյանի նպատակները պարզ են. 1. Վարկաբեկել Լեռնային Ղարաբաղի հանրապետությանը, ցույց տալ, թե այն ժողովրդական չէ, քանի որ  Freedom House-ն ու մնացած կազմակերպություններն իրենց զեկույցներում պետք է գրեն, որ ժողովրդավարական տեսանկյունից Արցախում մեծ առաջընթաց կա։ Այդ մարդը չի ուզում ՝ նման բան գրվի։ Եվ փորձում է ապակայունացնել իրավիճակը և ցույց տալ, թե սա հետապնդում է քաղաքական հայացքների համար։

Ի՞նչ պետք է անի պետությունն այս պարագայում։ Թողնի, որ ինչ-որ քաղաքական թափառական, որևէ ձևով չպատժվի՞ իր արարքի համար։ Տարեց մարդու վրա ձեռք բարձրացնելը, ի՞նչ եք կարծում, կարելի՞ է թույլ տալ։ Եթե այդքան ուժեղ է, թող գնա օլիմպիական թիմի հետ ազատ ոճի ըմբշամարտում պայքարի։ Պետությունը պետք է նման բաների արձագանքի, հակառակ դեպքում կստացվի խրախուսել ագրեսիան, անպատժելիության մթնոլորտ ստեղծել։ Չենք կարող թույլ տալ, որ նախադեպ ստեղծվի, թե եթե քաղաքական ընդդիմախոս են,կարող ես քեզ ամեն բան թույլ տալ, հետո թմբկահարել, թե՝ տեսեք՝ քաղաքական հայացքներիս համար են հետապնդում, որն, իհարկե, չի համապատասխանում իրականությանը։ Խուլիգանություն է արել և պետք է դրա համար դատարանը որոշի, թե ինչպիսի պատիժ է նա կրելու։

Lurer.com-ը պատրաստ է լսել նաև հակառակ կողմի մեկնաբանությունը` իր ընթերցողներին այս խնդրի էությանն առավել իրազեկ դարձնելու համար: