Գտել են Ջոբսի տունը թալանողին

Ջոբսի տունը թալանած գողին հնարավոր է եղել հայնտաբերել միայն այն ժամանակ, երբ նա միացրել է Ջոբսի համակարգիչը։ Սարքը միացել է Apple-ի սերվերին և բացահայտել գտնվելու վայրը։ Գողը չի իմացել, որ մտել է Apple-ի հիմնադիր Ջոբսի տուն։ Ոստիկանության աշխատակիցները հայտնում են, որ Հյուսիսային Կալիֆորնիայում գտնվող Սթիվ Ջոբսի տնից տարել են 60 հազար դոլարի տեխնիկա ու զարդեր։ Կարիեմ Մաքֆարլինի գողացած իրերի մեջ է եղել նաև Ջոբսի լեգենդար համակարգիչը։

Հայնտի է, որ Ջոբսը հենց այդ համակարգչում էր պահում Apple կազմակերպության բոլոր գաղտնի ֆայլերի կոդերը, գաղտնագրերն ու անձնական փաստաթղթերը։

Մաքֆարլին միայն ձերբակալությունից հետո է իմացել, թե իրականում ում համակարգիչն է գողացել։ Գողոնի մեջ հայտնաբերել են նաև 3 iPad պլանշետային համակարգիչ, 3 iPods, 3 MP3 նվագարկիչ և Apple TV։ Թանկարժեք տեխնիկայից բացի՝ Մաքֆարլին գողացել է նաև Ջոբսի կորպորատիվ կրեդիտ քարտերն ու դրամապանակը, որում եղել է ընդամենը 1 դոլար։ Գողը անտարբեր չի անցել նաև Սթիվ Ջոբսի զարդեղենի կողով։ Նա վերցրել է 33 հազար դոլար արժողությամբ թանկարժեք քարերով պլատինե զարդը և Ջոբսի կնոջ՝ 28 500 դոլարանոց վզնոցը։
35-ամյա գողը հարցաքննության ժամանակ արդարացել է, որ մի քանի տարի է, ինչ գտնվում է ֆինանսական ծանր դրության մեջ ու նույնիսկ անտուն է մնացել և ստիպված է եղել գիշերել մեքենայում։