Ստեփանակերտը կողմնակից է Ադրբեջանի հետ բոլոր հարցերը բացառապես խաղաղ ճանապարհով եւ անմիջական երկխոսության միջոցով լուծմանը

Արցախի Հանրապետության նախագահ Բակո Սահակյանը դեկտեմբերի 2-ին Բուենոս Այրես քաղաքում այցելել է Արգենտինայի միջազգային հարաբերությունների խորհուրդ (CARI), որտեղ հանդես է եկել դասախոսությամբ: ԼՂՀ ղեկավարն անդրադարձել է Արցախ-Արգենտինա փոխհարաբերություններին, ԼՂՀ-ում պետականաշինության գործընթացին, Արցախի ներքին եւ արտաքին քաղաքականությանը, ադրբեջանա-ղարաբաղյան հակամարտության կարգավորմանը եւ տարածաշրջանային գործընթացներին:

Նախագահ Սահակյանը նշել է, որ Լատինական Ամերիկան էական հետաքրքրություն է ներկայացնում ԼՂՀ արտաքին քաղաքականության համար, ինչը պայմանավորված է ինչպես այստեղ հայկական խոշոր գաղութների ու պատմական հայրենիքի հետ նրանց ամուր կապերի առկայությամբ, այնպես էլ համաշխարհային աշխարհաքաղաքականության մեջ այդ երկրների դերակատարության շարունակական բարձրացմամբ:

Բակո Սահակյանն ընդգծել է, որ այս համատեքստում առանձնակի նշանակություն ունի Արգենտինայի հետ հարաբերությունների զարգացումը, որին Արցախը ընդունում է որպես բարեկամական եւ եղբայրական երկիր: Նախագահ Սահակյանը երախտագիտություն է հայտնել Արգենտինայի հանրապետությանը՝ հայ ժողովրդի ու մեր հայրենակիցների հանդեպ ունեցած վերաբերմունքի համար: Այն պետությունը, որը հնարավորություն է տվել Մեծ եղեռնից եւ հալածանքներից մազապուրծ եղած մեր հայրենակիցներին այստեղ գտնել իրենց նոր հայրենիքը եւ միաժամանակ չմոռանալ պատմականը, արժանի է ամենաբարձր գնահատանքի:

Խոսելով հիմնախնդրի նախապատմության մասին՝ երկրի ղեկավարը նշել է, որ ղարաբաղյան հիմնախնդիրը ծագել է 1918 թվականին, երբ Օսմանյան Թուրքիայի անմիջական միջամտությամբ Անդրկովկասում ստեղծվել է Ադրբեջան անունով պետություն, որը մինչ այդ պատմության մեջ երբեք գոյություն չի ունեցել եւ ստեղծվելուց հետո տարածքային պահանջներ է ներկայացրել բոլոր հարեւան երկրներին՝ Օսմանյան կայսրության հետ ցամաքային սահման ունենալու եւ պանթուրքական տիրություն ստեղծելու նպատակով:

Անդրադառնալով ադրբեջանա-ղարաբաղյան հակամարտության կարգավորմանը՝ Բակո Սահակյանն ընդգծել է, որ պաշտոնական Ստեփանակերտը կողմնակից է Ադրբեջանի հետ բոլոր հարցերը բացառապես խաղաղ ճանապարհով եւ անմիջական երկխոսության միջոցով լուծմանը: Նախագահը շեշտել է, որ Արցախի անկախությունն ու անվտանգությունը մեր ժողովրդի համար բացառիկ արժեքներ են եւ ենթակա չեն սակարկության: Բանակցային գործընթացի ամենամեծ խոչընդոտը նախագահը համարել է Ադրբեջանի ոչ կառուցողական դիրքորոշումը եւ այնտեղ պետական ամենաբարձր մակարդակով տարվող ծայրահեղական ու ռազմատենչ հակահայկական քաղաքականությունը:

Այնուհետեւ Բակո Սահակյանը պատասխանել է ներկաների հարցերին:

Միջոցառմանը ներկա էին Հայ Առաքելական եկեղեցու Արցախի թեմի առաջնորդ Պարգեւ արքեպիսկոպոս Մարտիրոսյանը, Արգենտինայում, Ուրուգվայում եւ Չիլիում ՀՀ արտակարգ եւ լիազոր դեսպան Վլադիմիր Կարմիրշալյանը, Արցախի հանրապետության նախագահի աշխատակազմի տեղեկատվության գլխավոր վարչության պետ Դավիթ Բաբայանը, Արգենինայում հավատարմագրված դիվանագետներ, քաղաքական եւ վերլուծական շրջանակների ներկայացուցիչներ: