Տիգրան Սարգսյանը Հայաստանի տնտեսությունից բացի քայքայելու է նաև քաղաքական դաշտը. Լյուդմիլա Սարգսյան

Հաճույքով կհավատայի նման օրակարգին, եթե իրական խնդրին տեղյակ չլինեի։ «Առավոտ»-ին իր վրդովմունքն է փոխանցել ՀԱԿ անդամ, ՍԴՀԿ-ի ատենապետ Լյուդմիլա Սարգսյանը՝ վարչապետ Տիգրան Սարգսյանի և Սոցիալ Դեմոկրատ Հնչակյան կուսակցության Կենտրոնական վարչության ատենապետ Սեդրակ Աճեմյանի ու դիվանի անդամ Վազգեն Կալթակճյանի (ԱՄՆ) հանդիպման առիթով:

«Առավոտ»–ը մեջբերում է պաշտոնական հաղորդագրությունը, ըստ որի,

«ՍԴՀԿ ԿՎ ղեկավարության հետ զրույցում Տիգրան Սարգսյանն անդրադարձել է Սիրիայում տիրող իրավիճակին և այնտեղի հայ համայնքի անվտանգության ապահովման հետ կապված կառավարության ձեռնարկած քայլերին: ՍԴՀԿ ԿՎ անդամներն իրենց գոհունակությունն են հայտնել սիրիահայ համայնքին ուղղված՝ ՀՀ կառավարության ձեռնարկած քայլերի առնչությամբ, ինչպես նաև պատրաստակամություն հայտնել համագործակցել գործադիրի հետ սիրիահայ համայնքի խնդիրների լուծման հարցում»:

«Առավոտ»-ը գրում է, օգոստոսի 24-ին կայանալու է ՍԴՀԿ-ի շուրջ վերջին տարիներին տեղի ունեցող զարգացումների հետ կապված հերթական դատական նիստը: Տիկին Սարգսյանի կարծիքով՝ Սեդրակ Աճեմյանին սիրիահայությունից առավել մտահոգում է այդ խնդիրը:

«Այդ խնդրի լուծման իրական մենեջերը Տիգրան Սարգսյանն է, ով մշտապես փորձել է աջակցել Սեդրակ Աճեմյանին: Ցավալի է, բայց փաստ, որ մեր երկրում իշխանությունն իր բուն գործառույթներով զբաղվելու փոխարեն, ամեն ինչ անում է ընդդիմադիր արմատական դաշտը ոչնչացնելու համար: Վստահաբար կարող եմ ասել, որ Սեդրակ Աճեմյանը շատ լավ հասկանում է, որ եթե դատարանի նկատմամբ ճնշումներ և միջամտություն չլինի, հնարավոր է, որ արդարացի վճիռ կայացվի' հօգուտ մեզ, քանի որ մեր ներկայացրած հակափաստարկներն անհերքելի են: Պետռեգիստր և արդարադատության նախարարություն իրենց ներկայացրած փաստաթղթերն ակնհայտ կեղծ են, հետևաբար, դատարանն այլընտրանք չի ունենալու»,- ասում է Լյուդմիլա Սարգսյանը:

Առավել քան վստահ լինելով, որ ԱՃեմյանը հայցել է վարչապետի աջակցությունը, «Առավոտ»-ի զրուցակիցը հայտարարում է. «Եթե առաջիկայում տեսանելի լինի, որ դատարանը գործն այլ ուղղությամբ է տանում, ապա մեղադրանքն ուղղվելու է ուղիղ Տիգրան Սարգսյանին և Հրայր Թովմասյանին»: Տիկին Սարգսյանը պնդում է, որ օգտագործելու է նաև Աժ պատգամավորի իր հնարավորությունները՝ հարցին արդարացի ընթացք տալու համար: «Եթե այսպես շարունակվեց, Տիգրան Սարգսյանը Հայաստանի տնտեսությունից բացի քայքայելու է նաև քաղաքական դաշտը»,- «Առավոտ»-ին ասել է Լ.Սարգսյանը: