Տեր Նավասարդ արքեպիսկոպոս Կճոյանը մշտապես եղել է հայոց բանակի և հայ զինվորի կողքին

Տեր Նավասարդ Արքեպիսկոպոս Կճոյանի անվան շուրջ վերջին օրերին բարձրացված անառողջ և անհիմն աղմուկի, ուղղորդված արշավի և հարձակումների ֆոնին հանրությունը կարծես մոռացության է մատնել այն ազգանվեր գործունեությունը, որը տարիներ շարունակ առանց ավելորդ աղմուկի և հոգևորականին վայել համեստությամբ ծավալել է Արարատյան հայրապետական թեմի առաջնորդը: Մասնավորապես, որևէ մեկի համար գաղտնիք չէ, որ Նավասարդ Արքեպիսկոպոս Կճոյանը մշտապես եղել է հայոց բանակի և հայ զինվորի կողքին: Դիցուք՝ Հայ Առաքելական եկեղեցու Արարատյան Հայրապետական թեմում առաջնորդական փոխանորդ գերաշնորհ Տ. Նավասարդ արքեպիսկոպոս Կճոյանի նախաձեռնությամբ և ջանքերով 4 տարի անընդմեջ` 2014-2017թթ. կյանքի է կոչվել «Մենք մեր զինվորի կողքին ենք» բարեգործական ծրագիրը: Սուրբ Սարգիս զորավարի տոնի առիթով 2014-2016թթ կազմակերպված դրամահավաքների ընթացքում հանգանակված 150.000.000 (հարյուր հիսուն միլիոն) ՀՀ դրամն ամբողջությամբ ուղղվել է բարեգործական ծրագրի իրականացմանը: Նախաձեռնության արդյունքում աջակցություն է ցուցաբերվել հակառակորդի հետ շփման գծում, մարտական հերթապահություն իրականացնելիս զոհված զինծառայողների, միաժամանակ 2 և ավելի զինծառայող ունեցող ընտանիքների, առաջին, երկրորդ և երրորդ խմբի զինհաշմանդամների` թվով 762 ընտանիքի: Մշտապես լինելով հայոց բանակի կողքին, Թեմը և թեմի առաջնորդը բնականաբար, չէին կարող չարձագանքել ղարաբաղա-ադրբեջանական ապրիլյան իրադարձություններին։ Նավասարդ Սրբազանի հորդորով և օրհնությամբ, Արցախի բանակին, ժողովրդին, սահմանապահ զինվորներին աջակցելու գաղափարի շուրջ համախմբվեցին թեմի համայնքներն ու անհատ բարերարներ: Արդյունքում կազմակերպվեց և հաջողությամբ իրագործվեց Արցախի պաշտպանության բանակի աջակցության բարեգործական ծրագիրը, որի շրջանակներում թեմի հոգևորականների գլխավորությամբ միայն 2016թ. ապրիլ և մայիս ամիսներին Արցախի առաջնագիծ իրականացված 11 այցելությունների արդյունքում հասցվել է 33 տոննա օգնություն (շուրջ 45 մլն դրամի)` սննդի, հիգիենայի պարագաների, հագուստի, դեղորայքի և բժշկական պարագաների, անվադողերի, հեռադիտակների, գիշերային դիտման սարքերի, առաջին անհրաժեշտության տարբեր իրերի տեսքով։ Բազմաբնույթ օգնություն է ցուցաբերվել Թալիշ գյուղից բռնագաղթած ընտանիքներին։ 2017թ. սեպտեմբերին, Նավասարդ Սրբազանի անձնական նախաձեռնությամբ 17 միլիոն ՀՀ դրամ է նվիրաբերվել 34 զինվորի ընտանիքի: 500.000 -ական դրամ են ստացել 26 զոհված զինծառայողի ընտանիք, և 8 առաջին և երկրորդ խմբի զինհաշմանդամ: 2016, 2017թթ. Սբ. Սարգիս զորավարի տոնի կապակցությամբ Նավասարդ Սրբազանի մտահղացմամբ իրականցվել է ևս մեկ ծրագիր` «Սահմանային գծում ծառայության ընթացքում առավել աչքի ընկած զինվորների պարգևատրում», որի արդյունքում 41 լավագույն զինվորիների տրամադրվել են հատուկ նրանց համար սահմանափակ քանակությամբ պատրաստված Սբ. Սարգիս զորավարի խորհրդանշական զարդապատկերներ և խաչեր, նաև 200.000 ական ՀՀ դրամ: Պաշտպանության նախարարության կողմից բոլոր 41 զինծառայողներին տրամադրվել է տասնօրյա արձակուրդ: Սրբազանի նախաձեռնությամբ բազմաթիվ բարեգործական միջոցառումներ, համերգներ են կազմակերպվել, որոնց ողջ հասույթը ուղղվել է մեր զինծառայողների ընտանիքների աջակցությանը: Նմանատիպ օգնության են արժանացել նաև մարզերում, գյուղերում բնակվող մեր զինվորները և նրանց ընտանիքի անդամները:  Մխիթար Սեբաստացի կրթահամալիրի սաներն մասնակցել են «Ասպետ» ռազմամարզական ճամբարին Արցախի հանրապետությունում: Կրթահամալիրի 60 սաների մասնակցությանը աջակցել է Արարատյան Հայրապետական թեմի առաջնորդական փոխանորդ բարձրաշնորհ Տեր Նավասարդ արքեպիսկոպոս Կճոյանը: Նավասարդ արքեպիսկոպսս Կճոյանի օրհնությամբ է իրականացվել նաև «Բերքից լավագույնը զինվորներին» ծրագիրը: Նրա նախաձեռնությամբ է իրականացվել նաև «Աջակցություն Արցախի սահմանապահներին» , ինչպես նաև «Այցելություն ու զորակցություն վիրավոր ու զոհված զինվորների ընտանիքներին» ծրագրերը: Բոլոր այս ծրագրերի նպատակն է աջակցել իրենց կյանքն ու առողջությունը հանուն Հայրենիքի նվիրաբերած զինվորների ընտանիքներին, զորավիգ լինել Հայրենիքի պահապաններին և ուշադրության կենտրոնում պահել մեր ազգի ու պետականության կարևոր պատվար բանակը: Եվ այսօր այն խմբերը և անհատները, ովքեր հայոց եկեղեցին թուլացնելու նպատակով թիրախավորում են բարձր հոգևորական դասին, պետք է առաջին հերթին իրենց հարց տան՝ իսկ իրենք ի՞նչ են արել մեր բանակի, մեր զինվորների, զինհաշմանդամների, մեր զոհված զինվորների ընտանիքներին աջակցելու ուղղությամբ: Ի տարբերություն պետական չինովնիկների, ում դռները մշտապես փակ են սևազգեստ մայրերի առջև, ովքեր խուլ են՝ բանակի ու զինվորի առջև ծառացած խնդիրների հանդեպ, ովքեր ամեն պատեհ առիթ օգտագործում են պետության հենասյուներից մեկը՝ բանակը սևացնելու համար՝ հայ եկեղեցու սպասավորները ի դեմս Նավասարդ Արքեպիսկոպոս Կճոյանի, մշտապես կանգնած են եղել հայոց բանակի և հայ զինվորի կողքին, ոչ միայն խոսքով, այլ առաջին հերթին՝ գործով...