Ռուբեն Հայրապետյանը փոշմանե՞լ է

«Հրապարակ»-ը գրում է.

«Հուլիսի 3-ին Ռուբեն Հայրապետյանի՝ պատգամավորական մանդատից հրաժարվելու հայտարարությունը հիմա կարելի է վստահորեն ասել, որ նախագահական նստավայրի բեմադրած ներկայացումն էր: Սեփական ռեստորանում թիկնապահ-գազանների ձեռամբ Վահե Ավետյանին հոշոտած Նեմեցն այլևս մոռացել է իր սրտաճմլիկ տեքստը և այս թեմայով հարցերին պատասխանում է նույն լպիրշությամբ, ինչպես նախկինում: 

Թերթին հետաքրքրել է` արդյոք Ռուբեն Հայրապետյանն այս ընթացքում չի՞ փոշմանել, կամ էլ իր ընկեր Սամվել Ալեքսանյանը չի՞ համոզել, որ հետ կանգնի մանդատը վայր դնելու մտքից: Թերթը հիշեցնում է, որ չնայած Հայրապետյանը հայտարարել է մանդատը վայր դնելու մասին, սակայն, որպեսզի դա տեղի ունենա, պետք է որոշակի իրավական գործընթացներ իրականանան:

«Աժ կանոնակարգ» օրենքի համաձայն, մանդատից պատգամավորի հրաժարականը գրավոր ներկայացվում է Ազգային ժողովի նախագահին, ով դա հրապարակում է Աժ առաջիկա նիստում: Դրանից հետո, եթե հրաժարական ներկայացրած պատգամավորը 15 օրվա ընթացքում ետ չի վերցնում հրաժարականի մասին իր դիմումը, ապա համարվում է ընդունված, ինչի վերաբերյալ Աժ նախագահն արձանագրություն է կազմում և ուղարկում ՀՀ ԿԸՀ: Եթե Ռուբեն Հայրապետյանի հրաժարականն այդ ժամանակ հրապարակվի, ապա կարող է ընդունված համարվել սեպտեմբերի 25-ից հետո: Մինչ այդ Ռուբեն Հայրապետյանը ցանկացած պահի կարող է ետ վերցնել իր հրաժարականը:

Հայտնի է, որ Հայրապետյանի հրաժարականը ներկայացվեց ամռանը, երբ արդեն Աժ-ն արձակուրդ էր գնացել, իսկ Աժ առաջիկա նիստը նախատեսված է սեպտեմբերի 10-ին: Ասել է՝ թե բարեհաջող ընթացքի դեպքում նա մանդատից կզրկվի միայն սեպտեմբերի վերջին։ 

Մինչդեռ, հաշվի առնելով Հայրապետյանի ներկայիս պահվածքը, բացառված չէ, որ նա փոշմանի: Իսկ նման փորձ նա ունի` մի ամբողջ ազգի առաջ ժամանակին հրապարակավ հայտարարեց, թե պատգամավորության թեկնածու չի առաջադրվելու, հետո փոշմանեց, իբր՝ ինձ համոզեցին առաջադրվել:

Ինչևէ, երեկ «Հրապարակ»-ը փորձեց Հայրապետյանից անձամբ տեղեկանալ՝ ուժի մե՞ջ է հրաժարականի դիմումը: Եվ Նեմեցը գործի դրեց իր հովվական բառապաշարը.

- Դուք հայերեն լեզուն չեք հասկանում, հա՞, երևի... Ինչքա՞ն կարելի ա, քանի՞ անգամ եմ ասել՝ ինձ հեռախոսով չզանգեք-հարցազրույց չվեկալեք:

- Հարցազրույց չենք ուզում, մեկնաբանություն է պետք ընդամենը:

- Մեկնաբանությունն ի՞նչ ա, մեկ ա՝ դու շատ լավ մեկնաբանում ես, շատ լավ փորձագետներ եք և ամենագրագետներն եք, ի՞նչ ա դա:

- Պարզապես ուզում էինք իմանալ՝ Ձեր մանդատը վայր դնելու հարցը դեռ ուժի մե՞ջ է, թե՞ փոշմանել եք:

- Տո քո ի՞նչ գործ ինչ եմ անելու...»։